चिनियाँ सरकारको सहयोगमा नेपालमा पेट्रोलियम पदार्थको अन्वेषण हुने भएको छ।
फेब्रुअरी २८ मा दुई सरकार बिच नेपालमा पेट्रोलियम पदार्थको अन्वेषण गर्ने सम्झौता भएको खानी तथा भूगर्भ विभागले जानकारी दिएको छ।
पेट्रोलियम अन्वेषणका लागि चिनियाँ टोली वैशाखमा नेपाल आउने विभागका उप-महानिर्दशक तथा पेट्रोलियम पदार्थ परियोजना प्रमुख सुधिर रजौरेले बताए।
उनका अनुसार नेपाल–चिनीयाँ सरकारबिच आर्थिक सहयोग गर्ने सम्झौता २०१७ अगष्टमा भएको थियो। करिब दुई साता अघि सो सम्झौता अनुरूप कार्यान्वयन सम्झौता भएको हो।
पेट्रोलियम पदार्थको अन्वेषण नेपालको दैलेख र थान्सिङ क्षेत्रमा गरिन्छ। पहिलो चरणमा म्याग्नेटोटेलुरिक सर्भे गरिन्छ। यो सर्भेमा जमिनको ५ देखि २० किमि सतह मुनीको बनावटको अध्ययन गरिन्छ। यसबाट पेट्रोलियम पदार्थ जम्मा भएर बस्ने संरचना पत्ता लगाउन सकिने उनले बताए।
दोस्रो चरणमा (सेस्मीक सर्भे) जमिन मुनी कम्पनको तरङ्ग पठाएर डिलिङ गरिन्छ। यस सर्भेबाट जमिनमुनि पेट्रोलियम पदार्थको भण्डारण कहाँ छ भन्ने पत्ता लगाउन सकिन्छ। उक्त पेट्रोलियम पदार्थ कति मात्रामा छ, आर्थिक रूपमा उत्खनन योग्य हुन्छ की हुँदैन भनेर हेरिन्छ।
त्यहाँ आर्थिक रूपमा उत्खनन योग्य पेट्रोलियम पदार्थ भेटियो भने पेट्रोलियम पदार्थको आयात घट्नुका साथै नेपालको अन्य क्षेत्रमा पनि पेट्रोलियम पदार्थ हुने सम्भावना बढ्ने उनको भनाई छ।।
सम्झौतापत्रमा नेपालको तर्फबाट विभागका महानिर्देशक डा. सोमनाथ सापकोटा र चीनको तर्फबाट चाइना जियोलोजिकल सर्भेका उपाध्यक्ष वाङ कुङले हस्ताक्षर गरेका थिए।
अहिले नेपाल र चिनियाँ सरकारबीच अन्वेषणको मात्र सम्झौता भएको हो। अन्वेषणका क्रममा पेट्रोलियम पदार्थ भेटिए उत्खनन कसले गर्छ? भन्ने विषयमा छलफल नभएको विभागले जानकारी दिएको छ।