विद्यार्थीहरूलाई खाजा, विद्यालयहरूमा एउटै कलर कोर्डलगायत शैक्षिक क्षेत्रमा नयाँ/नयाँ कार्यक्रम सुरू गरेको रुपन्देहीको तिलोत्तमा नगरपालिकाले सामुदायिक विद्यालयमा अध्ययनरत छात्राहरूलाई निःशुल्क स्यानिटरी प्याड उपलब्ध गराएको छ।
किशोरीलाई महिनावारी हुँदा पनि नियमित विद्यालय आउन प्रोत्साहित गर्नका लागि नगरपालिकाले स्यानिटरी प्याड निःशुल्क उपलब्ध गराएको हो।
स्यानिटरी प्याडको अभावमा महिनावारी हुँदा विद्यालय नआउने र आए पनि बीचमै कक्षा छाडेर घर जाने समस्यालाई अन्त्य गर्न सामुदायिक विद्यालयमा स्यानिटरी प्याड उपलब्ध गराउने व्यवस्था मिलाइएको नगर उपप्रमुख जागेश्वरी चौधरीले जानकारी दिइन्।
यसका लागि नगरपालिकाले चालू आर्थिक वर्षका लागि पाँच लाख रुपैयाँ बजेट छुट्याएको छ। कक्षा ६ देखिमाथिका छात्राहरूलाई लक्षित गरी नगरपालिकाले यस्तो व्यवस्था मिलाएको हो।
नगरपालिकामा आधारभूत २४ र माध्यमिक २० गरी ४४ वटा सामुदायिक विद्यालय रहेका छन्। जसमा कक्षा ६ देखि १० सम्म तीन हजार ६ सय ५० छात्रा अध्ययनरत छन्।
सरदरमा प्रतिछात्रा १ सय ३६ रुपैयाँका दरले स्यानिटरी प्याडका लागि विद्यालयलाई रकम दिइएको नगरपालिकाका शिक्षा उपसचिव हरिप्रसाद ज्ञवालीले जानकारी दिए।
‘छात्राहरू विद्यालयमा रजस्वला भएपछि बीचमै पढाइ छाडेर घर जानुपर्ने बाध्यताको अन्त्यका लागि यस्तो व्यवस्था मिलाइएको हो,’ उनले भने।
कतिपय छात्राहरूले आर्थिक अभावका कारण पुराना कपडा प्रयोग गर्ने र त्यसबाट संक्रमण हुन सक्ने भएकाले सचेतना अभिवृद्धिका लागि पनि स्यानिटरी प्याड उपलब्ध गराइएको नगरपालिकाको भनाइ छ।
छात्रा संख्याको आधारमा नगरपालिकाले विद्यालयको खातामा रकम जम्मा गरिदिएपछि विद्यालयहरूले प्याडको व्यवस्था मिलाएका छन्। यसका लागि विद्यालयहरूले एक जना महिला शिक्षकलाई ‘फोकल पर्सन’ तोकेका छन्।
स्यानिटरी प्याडको उपलब्धताले किशोरीहरू ढुक्कसँग विद्यालय आउने वातावरण बनेको जनजागृति माविका शिक्षक नरेन्द्र बहादुर क्षेत्रीले बताए।
‘नगरपालिकाले बजेट नदिँदासम्म स्कुलमा स्यानिटरी प्याडको व्यवस्था थिएन। नगरपालिकाले बजेट दिएपछि चालू शैक्षिक सत्रबाट हामीहरूले छात्राहरूलाई आवश्यकताका आधारमा निःशुल्क स्यानिटरी प्याड दिन थालेका छौं। यसबाट उनीहरूमा सकारात्मक प्रभाव परेको छ,’ उनले भने।
यसैगरी नगरपालिकाले गर्भवती महिला, ज्येष्ठ नागरिक र अपाङ्गता भएका व्यक्तिलाई निःशुल्क एम्बुलेन्स सुविधा उपलब्ध गराउने तयारी गरेको छ।
यस्तै नगरका बर्थिङ सेन्टरमा सुत्केरी हुने महिलाहरूलाई नगरपालिकाले संघीय सरकारले उपलब्ध गराउने रकममा पाँच सय रुपैंयाँ थपेर दिने गरेको छ।
नगरपालिकामा दुइटा बर्थिङ सेन्टर रहेका छन्। नियमित स्वास्थ्य परीक्षण गराई बर्थिङ सेन्टरमा सुत्केरी महिलाले प्रोत्साहन भत्ता स्वरूप दुई हजार पाँच सय रुपैयाँ प्राप्त गर्छन्।
