आउँदो ईङ्ल्याण्ड विश्वकपका लागि श्रीलंकाले सन् २०१५ देखि एउटा पनि एक दिवसीय खेल नखेलेका दिमुथ करूणारत्नेलाई कप्तान बनाएको छ।
उनलाई श्रीलंकाको टेस्ट स्पेशलिस्ट मानिन्छ। ३० वर्षिय दिमुथले ९ वर्षको क्रिकेट करियरमा ६० अन्तराष्ट्रिय टेस्ट म्याच खेल्दा केवल १७ एक दिवसीय खेल खेलेका छन्। त्यस्तै उनले आजसम्म श्रीलंकाको लागि एउटा पनि टी-२० क्रिकेट खेलेका छैनन्।
उनलाई बुधबार टोलीको कप्तान घोषणा गरिएको हो। श्रीलंकाले विश्वकपका लागि कप्तानको घोषणा गरेपनि टोलीको भने घोषणा गरिसकेको छैन।
मे ३० बाट विश्वकप सुरू हुँदैछ।
दिमुथले अन्तिमपटक सन् २०१५ को विश्वकपमा एक दिवसीय क्रिकेट खेलेका थिए। यस्तोमा उनलाई कप्तानका रूपमा गरिएको घोषणाले धेरैलाई अचम्ममा पारेको छ। १७ वान डे म्याचमा उनले १५.८३ को औषत रन बनाएका छन् जसमा उनको सर्वोच्च स्कोर ६० रन रहेको छ।
उनी वर्तमान श्रीलंकन टेस्ट टोलीका कप्तान हुन्। उनको कप्तानीमा श्रीलंकाले यस वर्ष दक्षिण अफ्रिकामा एतिहासिक टेस्ट सिरिज जितेको छ। श्रीलंकाले पछिल्ला चार सिरिज अलग-अलग ४ कप्तानको कप्तानीमा खेलेको छ।
दिमुथ कप्तान बनेसँगै स्टार बलर लसिथ मालिंगा कप्तानीको दौडबाट बाहिरिएका छन्। दिमुथ पछिल्लो समय नशामा गाडी चलाएको आरोपमा पक्राउ परेका थिए। उनलाई सो घटनामा जरिवाना सराइएको थियो।