खगेन्द्र लामिछाने अब सिनेमा निर्देशक बन्ने भएका छन्। आइतबार आफ्नो निर्माण, अभिनय तथा निर्देशनमा 'पानीफोटो' बन्न लागेको लामिछानेले घोषणा गरे।
सिनेमा उनी लिखित सोही नामको नाटकमा आधारित हुनेछ। सिनेमाले १५ वर्ष अगाडि द्धन्द्व कालमा हराएको छोराको प्रतिक्षामा बसेका बाबुआमाको कथा पेस गर्ने बताइएको छ ।
काठमाडौं, चितवन, स्याङ्जा र रोल्पामा सिनेमा छायाँकन हुनेछ।
सिनेमामा लामिछानेका अलावामा सुनिल पोखरेल, निशा शर्मा पोखरेल, अनुप बराल, खगेन्द्र लामिछाने, मेनुका प्रधान, प्रकाश घिमिरे, माओत्से गुरुङ, बुद्धि तामाङ, कमलमणी नेपाल, अशान्त शर्मा, श्याम कुमार खड्का लगायतका कलाकारको सिनेमामा अभिनय रहने छ ।
सिनेमा घोषणा कार्यक्रममा बोल्दै लामिछानेले ‘पानीफोटो’ निर्देशन आफ्नो सपना रहेको बताए।
‘यसपछि म सिनेमा निर्देशन गर्छु-गर्दिन थाहा छैन् । तर, ‘पानीफोटो’ मैले निर्माण गर्न चाहेको जस्तो सिनेमा हो, त्यसैले यसलाई उत्कृष्ट बनाउने प्रयास गर्नेछु’, उनले भने, ‘मैले ‘पानीफोटो’लाई नाटकको रुपमा निर्माण गर्दैगर्दा एक दिन सिनेमाको रुपमा ढाल्ने छु भनेर सोचेको थिए । आज आएर बल्ल त्यो सपना पुरा हुने समय जुरेको छ । हेरौ कति सफल हुन्छु, त्यो भोली सिनेमा बनेर हलमा आए पश्चात तपाईहरुको प्रतिक्रियाले बताउने छ।’
अभिनेता, निर्माता तथा निर्देशक लामिछाने स्वयंमले पानीफोटोको कथा, पटकथा तथा संवाद तयार पारेका हुन् ।
