सेतोपाटीमा नियमित 'हजुरआमाका कथा' श्रृंखला लेख्दै आएकी अमृता लम्सालको यही शीर्षकको किताब प्रकाशित भएको छ।
आउँदो शनिबार (असोज ४) मा सार्वजनिक हुने 'हजुरआमाका कथा' किताबमा लम्सालका प्रकाशित तथा अप्रकाशित कथाहरू समेटिएका छन्।
हजुरआमाका कथामा तेइस जना हजुरआमाका जीवन अनुभवहरू समेटिएका छन्। साथै तीन जना नातिनी पुस्ताका अनुभव पनि छन्।
किताब अक्षर क्रिएशन्सबाट छापिएको हो। हजुरआमाका कथा पुस्तकलाई 'हर स्टोरी'कै श्रृंखलाका रूपमा प्रकाशन गरेको अक्षर क्रिएशन्सले जनाएको छ। प्रकाशकले 'हर स्टोरी' अन्तर्गत पुस्तक 'टेलिङ अ टेल' र 'स्वअस्तित्वको खोज' शीर्षकका दुई किताब बजारमा ल्याइसकेको छ।
'मनको बह कसैसित नकह जस्ता उखान स्थापित भएको समाजमा महिलालाई आफ्ना मनका कुरा सार्वजनिक गर्ने स्वतन्त्रता पहिला पनि थिएन र अहिले पनि सहज छैन,' लम्सालले भनिन्, 'नारी मौनतालाई आदर्शताको परिभाषा दिएको समयमा हुर्किएका हजुरआमाहरूले आफ्ना जीवनका अनुभव भन्नु ठूलो कुरा हो। मैले उहाँहरूका भाव टिपेर लेखेकी हुँ।'
इतिहास, राजनीति, धर्म, दर्शन, साहित्य, कानुन सबैमा पुरुषसत्ताको हैकम स्थापित भएको कारणले हजुरआमाहरूका जीवन पनि प्रभावित भए।
उनीहरूको आवाज, इच्छा, सपनाहरू मौलाउन पाएनन्। बाध्यात्मक परिस्थितिमा ती हजुरआमाहरू कर्मठ, कर्मशील र जुझारु बनेर घर परिवार मात्र धानेनन्, प्रत्यक्ष र अप्रत्यक्षरुपमा देशलाई योगदान गरे। यसैको वर्णन लम्सालले किताबमा गरेकी छन्।
माओवादी जनयुद्धमा स्थानीय महिलामा परेको असर र प्रभाववारे २०५५ सालमा रुकुम र रोल्पाका विभिन्न जिल्लामा स्थलगत रिपोर्टिङ गरेकी लम्सालले लैंगिक समानता र समावेशी सिद्धान्तको पक्षमा विभिन्न पत्रपत्रिकामा लेख्दै आएकी छन्।
'हजुरआमाका कथा' उनको पहिलो पुस्तक हो ।