शैली थिएटर रातोपुलमा चर्चित रुसी साहित्यकार एन्टोन चेखबको एकांकी नाटक ‘विवाहको प्रस्ताव’ (द म्यारिज प्रपोजल) मञ्चन हुने भएको छ।
पुस १८ देखि मञ्चन हुने यो नाटकमा बिहेसँग जोडिएको सरल कथावस्तुलाई हाँस्यास्पद अवस्था सृजना गरी सामाजिक चाल चलनमाथि तिखो व्यंग्य गरिएको छ।
७० वर्षकी वृद्धा स्टिपान स्टेपानोभिजकी छोरी नतालियासँग ३५ वर्षे छिमेकी इभान भ्यासिलिचको बिहेको प्रस्तावमा वरिपरि नाटक केन्द्रित छ।
मनभित्र एउटा र बाहिर अर्कै देखाउने उद्देश्यका साथ पात्रहरू मञ्चमा देखिन्छन्। यसरी नक्कली काम गर्दा उनीहरुको असली चरित्र बीचबीचमा उदांगो हुन्छ, र यसले नाटकमा हाँसो सिर्जना गर्छ। ती पात्रहरु कहिले जमिनको विवादमा अल्झिन्छ त कहिले कसको कुकुर भन्ने कुरामा झगडा गर्छन्। यसले बिहेको प्रस्ताव स्वीकार्य होला कि नहोला भन्ने अवस्थामा नाटकले गति लिन्छ।
मुख्य कलाकार सशांक बोहोराले इभान, स्नेहा पौडेलले नतालिया र सुबास सुबेदीले स्टेपान स्टेपानोभिचको भूमिका निर्वाह गर्नेछन्। कोरसमा मास्क लगाएर वा गाउँलेको भूमिकामा देबेन्द्र बब्लु, भारती रिजाल, रोबिन तामाङ, बिशाल सुबेदी, दिप्ती पौडेल, निर्भिक भट्टराई, रुपक काफ्ले र सन्तोष बराइलीले काम गरेका छन।
नेपाली भाषामा मञ्चन नाटकमा भेषभूषा, सेट र दृश्यमार्फत् रुसी वातावरणको झल्को पाइनेछ।
चेखबको नाटकलाई सबिन न्यौपानेले नेपालीमा अनुवाद गरेका हुन्। नवराज बुढाथोकीको निर्देशन रहने नाटकमा देवेन्द्र बब्लुको संगीत अनि अमन माली, सुजन माली र सुशील मालीको स्वर रहनेछ।
एक घण्टा पन्ध्र मिनेट लामो यो नाटक माघ १० सम्म मञ्चन हुने शैली थिएटरले जनाएको छ। शैली थिएटरले माघ महिनाको अन्तिम हप्ता गरिने ११औं राष्ट्रिय बाल नाटक महोत्सवको तयारी पनि गरिरहेको छ। महोत्सवमा सहभागी हुन आयोजकले स्क्रिप्ट आह्वान गरिरहेको छ।