नेपालले लोपोन्मुख र दुर्लभ वन्यजन्तु संरक्षणमा विगतका वर्षहरुमा प्राप्त गरेको सफलता संसारमै अग्रणी र उदाहरणीय रहेको भन्दै बेलायतको संसदमा छलफल हुने भएको छ। यस सम्बधिको प्रस्ताव वेलायतको संसदमा दर्ता भई सकेको र नेपालको यो सफलता सम्बन्धि छिटै संसदमा छलफल हुने बताईएको छ ।
लन्डनस्थित नेपाली दूतावासमा आयोजित नेपाल विकास कन्फेरेन्समा बोल्दै कार्यक्रमका प्रमुख अतिथि सांसद जोन म्यानले उक्त कुरा बताएका हुन्।
आफ्नो मन्तव्यको अधिकतम समय नेपालको वन्यजन्तु संरक्षण सफलता सम्बन्धि प्रशंसामा खर्चिएका सांसद म्यानले तथ्य र प्रमाणहरुले नै नेपाल संसारका अरु देशहरु भन्दा यो मामिलामा अग्रणी रहेको पुष्टी भईसकेको बताए। ‘वन्यजन्तु संरक्षणमा नेपालले कसरी यस्तो सफलता प्राप्त गर्न सक्यो तपाईँ नेपालीले अरूलाई सिकाउनुपर्यो यो कसरी सम्भव छ’, संसारका अन्य देशले नेपालको सिको गर्नु पर्ने भन्दै उनले आफ्नो मन्तब्यमा आफूहरूले वेलायती संसदमा समेत यस सम्बन्धि प्रस्ताव दर्ता गरिसकेको र यसमा छिट्टै बहस समेत हुने आश्वाशन दिए।
विश्वका कतिपय देशमा चोरी शिकारी रोकथाम गर्न नसक्दा बाघ, गैडा जस्ता लोपोन्मुख जनावर अस्तित्वको संकटमा परिरहेको बेला नेपालमा बाघको संख्यामा झन्डै दोब्बर बृद्धि हुनु अत्यन्तै प्रशंशा योग्य रहेको कुरा उनले आफ्नो मन्तब्यमा बताएका थिए।
कार्यक्रमलाई सम्बोधन गर्दै बेलायती फिल्ड मार्शल सर जोन च्यापलले समेत वन्यजन्तु संरक्षणमा नेपालको सफलताको बिशेष चर्चा गरे। ‘जबकी अफ्रिकामा एक वर्षमै एक हजार गैडाहरु अवैध रुपमा मारिएका छन् नेपालमा विगत ४ वर्षमा जम्मा चार वटा गैडा मात्र गुमेका छन्', च्यापलले नेपालका राष्ट्रिय निकुन्ज हरुको इतिहास केलाउदै भने।
साथै उनले नेपालको तराई क्षेत्रमा जंगली हात्तीहरुले मानव वस्तीमा निम्त्याउने आतंकलाई सफलता पूर्वक कम गर्न सकिएको उदाहरण समेत दिए। च्यापलले जंगल र निकुन्ज वरपरका स्थानीयहरु संगको सहकार्य महत्वपूर्ण हुने बताए।
लन्डनस्थित नेपाली दूतावासको आयोजनामा नेपाल विकास कन्फेरेन्सको तेस्रो शृंखला बेलायती विदेश मन्त्रालयका उच्च पदस्थ अधिकारी, बेलायती सांसद तथा नेपाल विकास सम्बन्धि विज्ञ तथा जानकारहरुको सहभागितामा सम्पन्न भएको हो ।
मंगलबार दूतावासको सम्मेलन कक्षमा आयोजित कार्यक्रममा बोल्दै बेलायती विदेश मन्त्रालयका दक्षिण एसिया विभागका प्रमुख फर्गस अल्डले २०० वर्ष पुरानो नेपाल बेलायत सम्बन्धको वर्तमान परिप्रेक्षमा आगामी २ सय वर्षसम्मको आपसी सहकार्यका क्षेत्रहरुको मार्गचित्र प्रस्तुत गरे ।
उनले बेलायत सरकार नेपालमा मानवीय सहयोगका अलावा निजी क्षेत्रको लगानी तथा हरित उर्जा उत्पादन जस्ता क्षेत्रमा सहयोग गर्न तत्पर रहेको बताए। गोर्खा सैनिक सेवाको प्रशंशा गर्दै उनले नेपाल बेलायत सम्बन्ध जनस्तर सम्मै गाढा रहेको उल्लेख गरे ।
कार्यक्रममा ब्रिटेन नेपाल सोसाइटीका अध्यक्ष एन्ड्रु स्पार्क्सले स्वागत मन्तब्य दिदै नेपालले प्राप्त गरेको राजनीतिक उपलब्धिहरुको चर्चा गरेका थिए ।
त्यसगरी नेपाली भाषा साहित्यमा बिद्यावारिधि गरिसकेका नेपालका प्रखर जानकार बेलायती नागरिक प्रोफेसर माईकल हटले ईतिहासको कालखण्डमा ब्रिटिश साम्राज्यले घेरिएर पनि सार्वभौम रहन सफल नेपाल र वेलायतको सम्बन्ध ऐतिहासिक र गुणस्तरीय रहेको बताए।
साथै उनले नेपालमा राजनैतिक स्थायित्व स्थापित भएको भन्दै वर्तमान सरकार प्रतिको आशा उच्च रहेको बताए ।
कार्यक्रमका सहभागीलाई बिशेष धन्यवाद ज्ञापन गर्दै वेलायतका लागि नेपाली राजदूत दुर्गा बहादुर सुवेदीले नेपाल वेलायत सम्बन्धमा केन्द्रित सम्मेलन उपलब्धिमुलक बनेको बताए।
नेपाल सरकारको उदारवादी ब्यापार नीतिको चर्चा गर्दै राजदूत सुवेदीले यो समय नेपाल सरकारसँग विकासमा सहकार्य गर्न उपयुक्त रहेको बताए।
साथै उनले नेपालको वन्यजन्तु संरक्षण सम्बन्धि प्रस्ताव वेलायती संसदमा दर्ता भएकोमा खुशी व्यक्त गर्दै नेपालको तर्फबाट आभार समेत व्यक्त गरेका थिए।
ब्रिटेन नेपाल सोसाईटीका गतिविधिको प्रशंशा गर्दै उनले बेलायतका नेपाली युवाहरु पनि सोसाइटीमा आवद्द हुनु खुशीको कुरा रहेको उल्लेख गरे ।
कार्यक्रम नेपाली दूतावास र ब्रिटेन नेपाल सोसाइटीको सहकार्यमा आयोजना गरिएको थियो ।
कार्यक्रममा काठमाडौंमा मेट्रो रेल सञ्चालनको सम्भाव्यता सम्बन्धि एक प्रिजेन्टेसन समेत प्रस्तुत गरिएको थियो। ‘काठमाडौको २० वर्षे रेल दृष्टी' नामक प्रस्तुतिमा काठमाडौमा अन्डरग्राउण्ड रेल सञ्चालनको सम्भाव्यतालाई केलाईएको थियो। वेलायतमा कार्यरत ईन्जिनियर डाक्टर विनोद लाल अमात्यले उक्त प्रस्तुति दिएका थिए ।
दूतावासका नियोग उप प्रमुख शरद राज आरणले सञ्चालन गरेको कार्यक्रममा नेपाली लोक नाचहरु समेत देखाईएको थियो ।
यहाँस्थित नेपाली दूतावासले यसअघि नै सम्बन्धित क्षेत्रका विज्ञहरुको सहभागितामा दुई वटा नेपाल विकास कन्फेरेन्स सम्पन्न गरिसकेको छ।
