बेलायतको लोकप्रिय तथा प्रतिष्ठित गोर्खाकप फुटबल प्रतियोगिताको १७ औं संस्करण एफसी तोङवाले जितेको छ ।
तमु धिं यूकेद्धारा आइतबार अल्डरसटमा आयोजित प्रतियोगिताको मुख्य विधामा ३२ टोलीबीच प्रतिस्पर्धा भएको थियो।
फाइनलमा रेडिंग युनिटीसँग बराबरीमा खेल सकिएपछि पेनाल्टीमार्फत विजयी हुँदै तोङवाले उपाधि जितेको हो।
भेटेरानतर्फ १० टिमले प्रतिस्पर्धा गरेका थिए। जसमा केन्ट एफसी विजेता र एफसी इलाम उपविजेता बने।
मुख्य समूहमा विजेता र उपविजेतालाई २५ सय र १५ सय पाउन्ड नगदसहित ट्रफी र प्रमाणपत्र प्रदान गरियो। भेटेरान समूहमा विजेतालाई १२ सय तथा उपविजेतालाई ८ सय पाउन्ड नगदसहित ट्रफी र प्रमाणपत्र दिइयो।
कार्यक्रमका प्रमुख अतिथि रश्मोर बरो मेयर सु कार्टर, लण्डनस्थित नेपाली दूतावासका उपनियोग प्रमुख शरदराज आरन, एफए लिगका संयोजक लरेन जोन्स, आयोजक तमु धिं युकेका अध्यक्ष नन्दजंग गुरुङ र संस्थापक अध्यक्ष मिनप्रसाद गुरुङ लगायतले पुरस्कार वितरण गरेका थिए।
प्रतियोगितामा सहभागी हुन बेलायतबाहिरबाट समेत केही टोली आएका थिए।
प्रतियोगितास्थलमा दर्जनौं खानाका स्टलका साथै बेलायतमा सञ्चालित नेपाली व्यवसाय तथा च्यारिटीमूलक स्टलहरू पनि थिए। कार्यक्रममा कलाकार सपनकुमार राई, प्रथम नौमती बाजा गुल्मी यूके र सयपत्री कल्चरल समूह यूके लगायतले विभिन्न प्रस्तुति गरेका थिए।
गोर्खाकप हेर्न बेलायतका विभिन्न क्षेत्रबाट हजारौं नेपालीहरू अल्डरसटमा जम्मा भएका थिए।
