राष्ट्र बैंकले असोज १० गतेदेखि नयाँ नोटको सटही सुरु गर्ने भएको छ। राष्ट्र बैंकका प्रवक्ता लक्ष्मीप्रपन्न निरौलाले १० गते शुक्रबार वा १२ गते आइतबारदेखि नयाँ नोट सटही हुने जानकारी दिए।
यस पटक एक व्यक्तिले १८ हजार ५ सय रुपैयाँसम्म नयाँ नोट सटही गर्न पाउने छन्। सोबाहेक पुराना नोटको सट्टा सुकिला नोट पनि सर्वसाधारणले सटही गर्न पाउने छन्। ५, १०, २०, ५०, १ सय र ५ सयका नयाँ नोट सर्वसाधारणले पाउने छन्।
उनका अनुसार सरकारी स्वामित्वका कृषि विकास, राष्ट्रिय वाणिज्य र नेपाल बैंकका उपत्यकाका शाखाहरुमार्फत नयाँ नोट वितरण हुनेछ।
त्यस्तै राष्ट्र बैंकको कार्यालय बालुवाटारबाट पनि नयाँ नोट वितरण गर्ने तयारी रहेको उनले बताए।
यसअघि राष्ट्र बैंकको थापाथली कार्यालयबाट नयाँ नोट वितरण हुने गरेकोमा त्यहाँ भौतिक संरचना निर्माणको क्रम चलिरहेकाले बालुवाटारबाटै वितरण गर्ने तयारी भएको हो।