चालु आर्थिक वर्षको पहिलो महिनामा मात्रै बैंक तथा वित्तीय संस्थाका १ सय १९ नयाँ शाखा थपिएका छन्। गत असार मसान्तमा ८ हजार ६ सय ८६ शाखा रहेकोमा साउन महिनामा ८ हजार ८ सय ५ पुगेको नेपाल राष्ट्र बैंकले जनाएको छ।
राष्ट्र बैंकका अनुसार पछिल्लो पाँच वर्षमा मात्रै ५ हजार २ सय ३० नयाँ शाखा खोलिएको छ। आर्थिक वर्ष २०७०/७१ मा ३ हजार ४ सय ५६ शाखा रहेकोमा पाँच वर्षमा १ सय ५० प्रतिशतले शाखा विस्तार भएको हो।
सरकारले हरेक स्थानीय तहमा अनिवार्य शाखा विस्तार गर्नुपर्ने भएपछि वित्तीय पहुँच पनि बढेको छ। राष्ट्र बैंकका अनुसार ६०.९ प्रतिशत नेपाली नागरिकको कम्तीमा एक निक्षेप खाता रहेको बताएको छ।
बैंक तथा वित्तीय संस्थाका प्रतिशाखा जनसंख्या करिब ३३०० मा आइपुगेको राष्ट्र बैंकले जनाएको छ। निक्षेप खाता संख्या उल्लेख्य वृद्धि भई २ करोड ७८ लाख र कर्जा खाताको संख्या १४ लाख ४० हजार पुगेको बैंकको सार्वजनिक गरेको रिपोर्टमा उल्लेख छ।
यस्तै, मोवाइल बैकिङ्ग प्रयोगकर्ताको संख्या ८३ लाख ४७ हजार र जारी भएका डेविट कार्डको संख्या ६७ लाख ९ हजार पुगेको छ।
बैंकका अनुसार २०७६ असोजसम्ममा ७ सय ३९ स्थानीय तहमा वाणिज्य बैंकहरुको शाखा विस्तार भएको छ। २०७५ असार मसान्तसम्म ६३१ र २०७४ असार मसान्तमा २९६ स्थानीय तहहरुमा मात्र वाणिज्य बैैकहरुका शाखा विस्तार भएको थियो।
२०७६ असोज महिनासम्ममा प्रदेश ५ का सबै स्थानीय तहहरुमा वाणिज्य बैंकका शाखा पुगिसकेको छ भने सुदुर पश्चिम प्रदेशका ६ स्थानीय तहमा वाणिज्य बैंकका शाखा पुग्न बाँकी रहेको छ।
प्रदेश १ र गण्डकी प्रदेशका एक एक स्थानीय तह र कर्णाली प्रदेश, प्रदेश ३ र प्रदेश २ का दुई दुई स्थानीय तहहरुमा अझै बैंक शाखा नपुगेको बैंकको रिपोर्टमा उल्लेख छ।
