यो साता शेयर बजारमा उछाल देखिएको छ। १२१३.१२ अंकबाट कारोबार सुरु भएको शेयर सूचक ९७.११ अंकले बढेर १३१०.२३ अंकमा पुगेर बन्द भएको छ।
ठूला कम्पनीको कारोबार मापन गर्ने सेन्सेटिभ सूचक पनि यो हप्ता सकारात्मक नै देखिएको छ। बिहीबार सेन्सेटिभ सूचक २८२(८७ अंकमा पुगेर रोकिएको छ।
यो साता शेयर सूचकसँगै कारोबार रकम पनि बढेको छ। साता भरिमा ६ अर्ब ६६ करोड ८० लाख रुपैयाँ बराबरको कारोबार भयो।
हप्तामा चार दिन बढ्यो, एक दिन घट्यो
यो हप्तामा शेयर सूचक चार दिन बढ्दा एक दिन घटेको छ।
आइतबार ४२.६१ अंकले बढेको शेयर सूचक सोमबार १५ अंकले बढ्यो। दुई दिन लगातार बढेको शेयर सूचक मंगलबार ७ अंकले घट्यो। बुधबार र बिहीबार दुबै दिन सूचक क्रमश २० र २६ अंकले बढ्यो।
जेठ १९ पछि पहिलो पटक सूचक १३ सय कटेको छ। तीन वर्षदेखि घटिरहेको सूचक गत जेठ १९ गते १३ सय ५ अंकमा थियो। त्यसपछि निरन्तर ओरालो लागेको सूचक पछिल्लो केही हप्तादेखि बढेको हो।
आज बिहीर बजार १३१० अंकमा पुगेको छ।
त्यसो त गत फागुन १९ मा बजार पछिल्लो समयकै सबैभन्दा न्यून विन्दुमा थियो। फागुन १९ मा बजार ११ सय २ अंकमा पुगेको थियो।
६ अर्ब ६६ करोडको कारोबार
यो हप्ता ६ अर्ब ६६ करोड ८० लाखको रुपैयाँ बराबरको शेयर कारोबार भएको छ।
आइतबार १ अर्ब ३३ करोडको कारोबार हुदाँ सोमबार १ अर्ब ७० करोडको कारोबार भयो। मंगलबार १ अर्ब २ करोडको कारोबार भयो तर बुधबार भने अर्ब बढीको कारोबार भएन। बुधबार शेयर बजारमा ९० करोड ४८ लाख रुपैयाँ बराबरको कारोबार भयो।
बिहीबार भने १ अर्ब ६९ करोड ९९ लाख रुपैयाँ बराबरको कारोबार भएको नेप्सेले जनाएको छ।
कहिलेसम्म बढ्छ बजार?
पछिल्लो समय बैंकको तरलतामा भएको वृद्धिले शेयर बजार बढेको लगानीकर्ताले बताएका छन्। तर यो वृद्धि केही समयका लागि हो वा बढीरहन्छ भन्नेमा लगानीकर्ता अन्योलमा देखिन्छन्।
तीन वर्ष देखि लगातार घटिरहेको बजार अब बढ्ने धेरै लगानीकर्ताको विस्वास छ। लामो समय घटेर निकै न्यून विन्दुबाट बढ्न थालेकाले पनि बजारको वृद्धिले निरन्तरता पाउने उनीहरु बताउँछन्।
शेयर सूचक र कारोबार रकम दुबै बढेकाले शेयर कारोबारको वृद्धिदर केही समय रहने जानकारहरुको भनाइ छ।
शेयर लगानीकर्ता संघका अध्यक्ष उत्तम अर्याल अर्थमन्त्रीको अभिव्याक्ति र नियमक निकाय धितोपत्र बोर्डमा नयाँ अध्यक्षको नियुक्तीले शेयर सकारात्मक भएको बताउँछन्।
‘बैंकहरुले ब्याजदर घटाएका छन्, तरलता पनि बढेको छ’, अर्यालले भने, ‘यसकारण शेयर न्यून विन्दुमा पुगेर बढ्न थालेको छ। अब बजार बढ्छ।’
‘अहिले इन्स्योरेन्स र माइक्रोफाइनान्समा मात्रै बढोत्तरी देखिएको छ, वाणिज्य बैंक पनि बढ्न थाल्यो भने त्यसले शेयर सूचक अझै बढाउँछ,’ उनले थपे।
यस्तै लगानीकर्ता संघकी अध्यक्ष राधा पौडेल पनि अब बजारमा सकारात्मक हुने विस्वास गर्छिन्।
‘माघ शेयर बजारको सिजन पनि हो,’ उनले भनिन्, ‘बैंकमा तरलता बढ्नु र ब्याजदर पनि घट्नुले बजार अझै बढाउँछ।’
उनी लगानीकर्ता परिपक्क हुँदै गएको र नियमक निकाय तथा अर्थमन्त्री बजार प्रति सकारात्मक देखिएकाले यसले बजार बढाउने बताइन्।
