जेठ महिनादेखि नयाँ बानेश्वरमा ‘आइप्लेक्स’ मल संचालनमा आउने भएको छ।
यो मल हाल काठमाडौंमा संचालन भैरहेका मलहरुको तुलनामा थप सुविधायुक्त भएको प्रमुख कार्यकारी अधिकृत तथा संचालक गणेश ढुङ्गानाले दावी गरे। करिब ३० करोड लागतमा मलको निर्माण गरिएको उनले बताए। ‘निर्माण सुरु गरेको २ वर्षपछि हामीले निर्माण सकेका छौँ, जेठदेखि नै संचालन गर्नेगरी तयारी अन्तिम चरणमा पुर्याएका छौँ’ उनले भने।
बानेश्वर क्षेत्रमा सुविधायुक्त मल नभएकाले आइप्लेक्सले ग्राहकलाई चाहिने सामान खरिदका लागि टाढा जानुपर्ने बाध्यता अन्त्य गर्ने उनको भनाई छ।
‘एउटै छानामुनि बालबच्चादेखि वृद्धवृद्धा सबैलाई हुने विदेशी ब्राण्डका लत्ताकपडाहरु उपलव्ध हुनेछ’ ढुंगानाले भने। उनका अनुसार मलमा ५० भन्दा बढी अन्तर्राष्ट्रिय ब्रान्डका पसलहरु संचालन हुने छन्।
अत्याधुनिक सुविधायुक्त २ वटा सिनेमा हल संचालन हुने छ। नयाँ बानेश्वर क्षेत्रमा सिनेमा हल नभएकाले यहाँका बासिन्दा अन्यन्त्र जानुपर्ने बाध्यता छ। ‘विदाको कुनै दिन सदुपयोग गर्नका लागि मल उपर्युक्त हुनेछ’ ढुंगानाले भने ‘युवाहरुले सिनेमा हलमा बालबालिकाले गेम जोनमा समय बिताउन सक्छन्।’
साथै स्वादिला र स्वच्छ खानाहरुको ‘फुडकोर्ट’ पनि संचालन हुने उनले बताए। मनोरन्जनका लागि ‘ईभेन्टजोन’ तथा कफी बार पनि मलमा संचालन हुनेछ।
