नेपाल एइरलाइन्सले काठमाडौं बाट भारतको नयाँ दिल्ली र दुबई सेक्टरमा उडान थप गर्ने भएको छ। एयरलाइन्सले जहाजको उपयोगिता बढाउन उपलब्ध पाइलटबाट बढीभन्दा बढी उडान गर्ने योजना अनुसार सातामा दिल्ली ३ र दुबई एक उडान थप गर्न लागिएको जानकारी दिएको छ।
उडान थपका लागि विमानस्थलबाट स्लट पनि प्राप्त भइसकेको एयरलाइन्सले बताएको छ। जेट एयरवेजको उडान बन्द भएपछि हवाई भाडा बढेको छ। यस्तो अवस्थामा उडान थप गरी बजार हस्तक्षेप गर्न एयरलाइन्सलाई दबाब पर्दै आएको थियो।
एयरलाइन्सले काठमाडौं दिल्ली रुटमा सातामा वाइड बडी र न्यरोबडी जहाजबाट ७/७ उडान गरिने जानकारी दिएकोछ। एयरलाइन्सले यसअघि सातामा ११ उडान गर्दै आएको थियो। यसअघि सातामा १४ उडान गरेपनि एयरलाइन्सले ३ उडान कटौति गरेको थियो।
यस्तै सातामा ३ उडान गर्दै आएको दुबईमा पनि एक उडान थप गर्ने भएको छ।
पाइलट अभाव भन्दै थन्काएर राखिएका वाइ १२ जहाज उडानका लागि पाइलट तयार पार्ने काम अघि बढाइएको एयरलाइन्सले विज्ञप्ति मार्फत् जानकारी दिएको छ। आन्तरिक उडानका पाइलटको तालिम संचालन गर्न संस्थागत कार्य अघि बढाइ नेपालमा नै तालिम संचालन गर्ने व्यवस्था गरिएको जानकारी गराएको छ।
असार मसान्तभित्रै वाई १२का लागि २ जहाज क्याप्टेन तयार पारिने एयरलाइन्सले जानकरी दिएको छ।