आर्थिक वर्षको पहिलो महिना विदेशी लगानी प्रतिबद्धतामा बृद्धि भएको छ। उद्योग विभागमा आएको लगानी प्रतिबद्धताको परिमाणले वैदेशिक लगानी बढेको देखाएको हो।
चालू आर्थिक वर्ष २०७६/०७७ को पहिलो महिनामा ३ मुलुकबाट ३ अर्ब ८२ करोड १० लाख बरारबरको वैदेशिक लगानी भित्रिएको छ। चीन, भारत र बङ्गलादेशका लगानीकर्ताले २४ वटा परियोजनामा उद्योग विभागमार्फत सो लगानी प्रस्ताव गरेका हुन्।
यो गत आव ०७५/०७६ को सोही अवधिको तूलनामा ८१ प्रतिशतले बढी हो। गत आवको समीक्षा अवधिमा ६४ वटा परियोजनामा २ अर्ब ११ करोडको वैदेशिक लगानी भित्रिएको थियो।
चालू आवको साउन महिनामा कृषि तथा वनमा १, उत्पादनमूलकमा २, सेवामूलकमा ७ र पर्यटनमा १४ वटा वैदेशिक लगानी भित्रिएको छ। सो परियोजना सञ्चालनमा आए करिब १३ हजारले रोजगारी पाउने विभागको तथ्याङ्कले देखाएको छ।
सबैभन्दा बढी चिनियाँ लगानीकर्ताले प्रस्ताव गरेका छन्। २२ वटा उद्योगमार्फत ३ अर्ब ६२ करोड रूपैयाँ लगानी प्रतिबद्धता चीनबाटमात्र आएको छ। बढी लगानी गर्ने दोस्रो मुलुकमा बङ्गलादेश रहेको छ। बङ्गलादेशी लगानीकर्ताबाट एउटा गार्मेन्ट उद्योग खोल्नका लागि १५ करोड लगानी प्रस्ताव आएको छ। भारतका लगानीकर्ताले ५ करोडको होटल–रेष्टुरेन्ट खोल्न लगानी प्रस्ताव गरेका छन्।
विभागको तथ्याङ्क अनुसार चिनीयाँ लगानीकर्ताले १५ वटा होटल–रेष्टुरेन्ट, ३ वटा सेवामूलक, ३ वटा कार्गो, र एउटा उत्पालनमूलक उद्योग खोल्न लगानी प्रतिबद्धता गरेका छन्।
ऐन–नियम संशोधन हुँदै जादा लगानीकर्ता नेपालमा उद्योग खोल्न आकर्षित देखिएको विगभागका महानिर्देशक विनोद प्रकाश सिंहले बताए। पहिलो महिनामा आएको वैदेशिक लगानी प्रतिबद्धतालाई ठूलो परिमाणमा नहेरी सकारात्मक पक्षको रूपमा लिनुपर्ने महानिर्देशक सिंहले भनाइ छ।
‘यसलाई सकारात्मक पक्षको रूपमा लिई ऐन–नियम कार्यान्वयनको पाटोलाई महत्वदिनु पर्छ’, महानिर्देशक सिंहले भने।
सरकारले जेठ १ गतेदेखि एकल बिन्दुसेवा सञ्चालनमा ल्याएको छ।
सरकारले उद्योग व्यवसायीलाई एकै थलोबाट सेवा दिने गरि सञ्चालन गरेको एकल बिन्दु सेवालाई राम्रोसँग सञ्चालन गर्न सके स्वदेशी तथा विदेशी दुवै लगानी आकर्षित हुने उद्योगी, व्यवसायीहरू बताउँछन्।