नेपाल एयरलाइन्सले आफूसँग भएको बोइङ विक्रीका लागि तेस्रोपटक सूचना प्रकाशित गरेको छ। एयरलाइन्सले बोइङ किन्नेहरूलाई १५ दिनभित्र प्रस्ताव गर्न आह्वान गरेको हो।
२७ वर्ष पुरानो १९० सिट क्षमताको बोइङ विक्री गर्न एयरलाइन्सले सुरू मूल्यांकनमा करिब आधा मूल्य घटाएको छ।
परामर्शदाता नियुक्त गरेर जहाजको मूल्यांकनसहित एयरलाइन्सले गएको असारमा विश्वव्यापी टेन्डर आह्वान गरेको थियो। त्यसमा कोही पनि नआएपछि एयरलाइन्सले फेरि असोजमा टेन्डर प्रकाशित गरेको थियो।
पछिल्लो टेन्डरमा पनि योग्यता पुगेको प्रस्ताव नआएपछि तेस्रो पटकको सूचना निकालिएको एयरलाइन्सका प्रवक्ता गणेशबहादुर चन्दले जानकारी दिए।
एयरलाइन्सले यो पटकका लागि जहाजको न्यूनतम मूल्य ४८ करोड ७२ लाख रुपैयाँ(४२ लाख ५० हजार अमेरिकी डलर) तोकेको छ। प्रत्यक्ष सम्झौताबाट छिनोफानो हुने यो लिलामीमा जसले बढी कबोल गर्छ उसैले जहाज पाउने छ।
बोइङ ७५७ जहाजमा २ ओटा रोल्सरोयसका इन्जिन छन्। योसँगै जहाजका लागि स्टक पाटपुर्जा पनि किन्नेले पाउने छ।
सुरूमा एयरलाइन्सले जहाजको न्यूनतम मूल्यांकन ७६ लाख ७६ हजार अमेरिकी डलर हुने बताएको थियो। सोहीअनुसार पहिलो र दोस्रो टेन्डर पनि निकालिएको थियो। यो पटक सुरू मूल्यको ४४ प्रतिशत न्यूनतम मूल्य घटेको छ।
पहिलेको न्यूनतम मूल्यभन्दा दुबैपटक धेरै न्यून प्रस्ताव आएका र अब पनि विक्री नभए जहाजको उडान योग्यता प्रमाणपत्र नै सकिने भएकाले मूल्य घटाइएको चन्दले जानकारी दिए।
'यसअघि हामीले निकालेको टेन्डरमा त्यतिबेलाको न्यूनतम मूल्यभन्दा धेरै तल प्रस्ताव आएको थियो। अब पनि विक्री नगरे जहाजको उड्न पाउने साइकल सकिँदै छ। यस्तोमा हामीले यसअघि आएका प्रस्तावको उच्च मूल्यभन्दा केही माथि मूल्य राखेका छौ' चन्दले भने।
‘९एन-एसिबी’ नेपाली दर्ता नम्बर भएको गण्डकी नामको यो जहाजले हालसम्म ८९ हजार घण्टा उडिसकेको छ। एयरलाइन्सले यो जहाजबाट व्यावसायियक उडानमा लाभ घट्दै गएपछि विक्री गर्ने निर्णय गरेको थियो।
जहाज सन् २०२० को फेब्रुअरीसम्ममात्र उड्न सक्ने लाइफ भएकाले छिटो विक्री गर्नुपर्ने दबाबमा रहेकाले सिधै नेगोसिएसनमा गएको बताइएको छ।