नेपालबाट सबैभन्दा बढी निर्यात हुने वस्तुमा पाम ओयल देखिएको छ।
भन्सार विभागले शुक्रबार सार्वजनिक गरेको चालू आर्थिक वर्षको ६ महिनाको तथ्याङ्कमा निर्यात हुने प्रमुख वस्तुमा पाम ओयल देखिएको हो।
चालू आवको साउनदेखि पुससम्ममा ५७ अर्ब २७ करोड मूल्य बराबरको सामान निर्यात भएकोमा १३ अर्ब ८९ करोड मूल्य बराबरको पाम ओयल निर्यात भएको विभागको तथ्याङ्कले देखाएको छ।
चालू आवको शुरूआती महिनादेखि नै नेपालको निर्यात बढाउने प्रमुख वस्तु पाम ओयलमा गत पुस अन्तिमदेखि भारतले प्रतिबन्ध लगाएको छ।
दोस्रोमा भटमासकाे तेल ४ अर्ब ३७ करोडको निर्यात भएको छ।
त्यस्तै, ऊनी, गलैंचा तथा कार्पेट ३ अर्ब ६३ करोड, अलैंची २ अर्ब ५१ करोड, सेन्थेटिक धागोबाट बनेका कपडा १ अर्ब ६९ करोड, धागो १ अर्ब ६६ करोड, चिया १ अर्ब ५५ करोड, जुटबाट बनेका कपडा १ अर्ब ३९ करोड, जुस १ अर्ब ३१ करोड र जुटका बोरा १ अर्ब २२ करोड मूल्य बराबरको निर्यात भएको छ।
नेपालबाट सबैभन्दा बढी निर्यात गरिने देशमा भारत, अमेरिका जर्मन, बेलायत, टर्की र चीन रहेका छन्।
