नारायणी नदीमा आगामी फागुनदेखि मोटरबोट सञ्चालनमा आउने भएको छ।
भरतपुर महानगरपालिका–१६ मा मोटरबोट निर्माणको काम अन्तिम चरणमा पुगेको छ।
सरकारले पानी जहाजसम्बन्धी उद्योग दर्ता गर्न पाउने निर्णय गरेसँगै यहाँ मोटरबोट निर्माण सुरूवात भएको थियो।
मोटरबोट बनाइरहेको राइनो वाटर इन्टरटेन्मेन्ट प्रालिका प्रबन्ध निर्देशक रामचन्द्र कँडेलका अनुसार पानीजहाजसम्बन्धी उद्योग दर्ताको प्रावधान नभएकाले काममा केही ढिलाइ भएको थियो।
मन्त्रिपरिषद्को बैठकले उद्योग दर्ता गर्न पाउने निर्णय गरेसँगै अगामी महिनादेखि सानो जहाज सञ्चालनमा ल्याइने उनले जानकारी दिए।
'बाहिरको एसीपी लगाउन र सिसा राख्न बाँकी छ, केही दिनमा काम सक्छौँ', उनले भने।
उनले १० दिनभित्र अनलाइन बुकिङ आह्वान गर्ने जानकारी दिए।
मोटरबोटमा बिहानी खाना (ब्रेकफाष्ट क्रुज), दिवा खाना (लन्च क्रुज) र रात्रिकालीन खाना ( डिनर क्रुज)का लागि अनलाइन बुकिङ खुला गरिँदैछ। बाहिर तयारी खाना क्रुजमा तताएर खुवाउने समेत व्यवस्था मिलाइँदैछ।
जहाज भित्र नै गायकको गीतमा पर्यटक रमाउन सक्नेछन्। बारहरु रहनेछन्। भुइँतलामा ९० वटा कुर्ची , बीचमा ११० र छतमा २० जना बस्न मिल्ने प्रबन्ध निर्देशक कँडेलले जानकारी दिए। दोस्रो तलाको बाहिर बसेर समेत यात्रा गर्न सक्ने व्यवस्था मिलाइएको छ।
क्रुजको ब्रेकफास्टमा दुई घण्टाको यात्रा र लञ्च र डिनरमा तीन-तीन घण्टाको यात्रा गराइनेछ। यात्राका क्रममा काभ्रेघाटबाट शुरु यात्रा देवघाट हुँदै फर्किएर गोलाघाटसम्म बाह्य दृश्य हेरेर यात्रु रमाउन सक्नेछन्।
नेपालमा व्यावसायिकरूपमा सञ्चालन गर्न लागिएको यस प्रकारको मोटर बोट पहिलो रहेको बताइएको छ।
ज्ञानेश्वर सामुदायिक वनसंगै नारायणी नदी छेउमा जहाज निर्माणकार्य अन्तिम चरणमा पुगेको छ।
यसको सुरक्षा, सेवाग्राहीको सुरक्षा, वातावरणीय संरक्षणमा ध्यान दिँदै विशेष सावधानीका साथ क्रुज निर्माण र पूर्व तयारी गरिरहेको उनले बताए।
मोटरबोटको सञ्चालनका लागि आवश्यक तीन जना क्रिउ मेम्बर र प्राविधिक हाललाई विदेशी रहेका छन्। दीर्घकालीनरूपमा नेपाली जनशक्ति नै उत्पादन गर्नका लागि आवश्यक तालीम केन्द्र सञ्चालन गर्ने जनाइएको छ।
मोटरबोट निर्माण भारतीय कम्पनी ग्रान्डडुर मारिन इन्टरनेशनलले गरेको हो। मोटरबोट दुई इञ्जिन रहेका छन्। मोटरबोट गति प्रतिघण्टा ३५ किलोमिटर हुनेछ।
मोटरबोटको निर्माण गत वर्षको चैतबाट थालिएको हो। मोटरबोट निर्माणका लागि १५ करोड हाराहारी खर्च भएको जनाइएको छ।
(राससका लागि नारायण अधिकारी)
