काठमाडौं उडान गर्ने विदेशी एयरलाइन्स थपिएको छ। भारतको भिस्तारा एयरलाइन्सले नयाँदिल्ली-काठमाडौं उडान सुरु गरेको छ। भारतको टाटा समूह र सिंगापुर एयरलाइन्सको सयुक्त लगानीमा खुलेको एयरलाइन्सले काठमाडौं उडान मंगलबारबाट सुरु गरेको हो।
यो उडानबाट यात्रुले सुरक्षित र आरामदायी हवाई यात्राको बिकल्प पाउने विस्ताराका प्रमुख व्यवसायिक अधिकृत बिनोद कन्ननले बताए।
एयरलाइन्स भारतकै पहिलो पाँचतारे एयरलाइन्स भएको र यसले तीन क्याटागोरीमा सिट बिक्री गर्ने उनको भनाइ छ। उनका अनुसार एयरलाइन्सले बिजनेस, प्रिमियम इकनोमी र इकनोमी क्लासका टिकट बिक्री गर्ने छ।
सन् २०१९ को अगष्टदेखि अन्तर्राष्ट्रिय उडान सुरु गरेको एयरलाइन्सको यो पाँचौ गन्तव्य हो। सन् २०१५ मा भारतमा आन्तरिक उडान सुरु गरेको एयरलाइन्ससँग हाल ३९ जहाज छन्। यसबाट उसले आन्तरिक र अन्तर्राष्ट्रिय गरी ३६ गन्तव्यमा दैनिक २ सय उडान गर्दै आएको छ।
नयाँदिल्ली-काठमाडौं रुटमा दैनिक एक उडान गरिरहेको एयरलाइन्सले आवस्यकताको आधारमा उडान थप गर्दै जाने बताएको छ।
पहिलो उडान नै ९५ प्रतिशत अकुपेन्सी भएकाले आफूहरु यो रुटबाट उत्साहित भएको कन्ननले जानकारी दिए।
एयरलाइन्सले यो रुटमा सुरुवाती दुइतर्फी भाडा १६ हजार ९ सय हुने बताएको छ।
नेपाल र भारतबीचको व्यापार तथा सांस्कृति सम्बन्धका कारण उडानको आवस्यकता बढ्दै जाने र यसले नेपालको पर्यटकीय बजार पनि बढाउने कन्ननको विश्वास छ।
भारतीय हवाई बजारमा लोकस्टको अधिपत्य भएको तर सबैले एउटै प्रकारले सेवा दिइरहेकाले यसमा आफूहरुले लो कस्ट क्याटोगरीमा पनि थप आकर्षक सेवा दिइरहेको उनको भनाइ छ।
काठमाडौंबाट भारतका विभिन्न सहरमा नेपालको नेपाल एयरलाइन्स,भारतीय एयर इन्डिया,इन्डिगो र स्पाइसजेटले उडान गरिरहेका छन्। योसँगै नेपाल र भारतबीचको हवाई सेवामा पाँच एयरलाइन्स भएका छन्।
गएको वर्ष भारतको जेट एयरवेजले उडान बन्द गरेपछि यो क्षेत्रमा भाडा महंगिएको थियो। त्यसपछि भारतकै स्पाइसजेटले पुन: उडान सुरु गरेको थियो भने गो एयर पनि उडानको तयारिमा छ। नेपालको हिमालय एयरलाइन्स भने लामो समयदेखि प्रयास गर्दा पनि भारतमा उडान अनुमति पाएको छैन।
