प्रधानमन्त्री केपी शर्मा ओलीले सरकारलाई कमजोर बनाउनतिर सरकारी निकाय नै उद्दत रहेको बताएका छन्। राष्ट्रिय विकास समस्या समाधान समितिको बैठकलाई सम्बोधन गर्दै ओलीले भित्रबाटै कमजोर बनाउने खेल भएको बताएका हुन्।
मेलम्ची खानेपानी आयोजनाको सन्दर्भ निकाल्दै ओलीले सरकारी निकाय नै सरकारलाई कमजोर,अलोकप्रिय बनाउनतिर अग्रसर भएको बताए।
'असहयोगको वातावरण बनेको छ। खुलेआम सरकारलाई बदनाम गर्ने राजनीतिक तबाट पहिलेदेखि नै खेल हुँदै आएको कुरा हो, तर पछिल्लो समय सरकारी नियकाबाटै भएको छ। यसमा हामी सजग हुनु जरुरी छ। सजग हुने भनेको कसैले भन्ने ठाउँ नपाउनेगरी काम गर्ने हो। माननीय मन्त्रीहरुले यसमा ध्यान दिनु पर्यो।' उनले भने।
मेलम्ची आयोजनाको सन्दर्भमा आफूलाई तत्कालिन खानेपानी सचिवले पटकपटक ढाँटेको खुलाएका छन्। सरकारी निकायबाटै सरकारलाई निकम्मा देखाउन यस्ता प्रवृत्ति देखिएको उनले बताए।
'मेलम्चीमा ठेकेदारले धोका दियो। देशले धोका पायो। तर मैले सचिवबाट धोका पाएँ। मलाई गलत रिपोर्टिङ भएको छ। ठेकेदार भाग्नुअघि नै आयोजना सम्पन्न हुने बताउँदै आएका थिए। आजित भएर मैले मेरै नोटबुकमा सचिवलाई आयोजना सम्पन्न हुने मिति लेख्न लगाएको थिएँ। तर उनले लेखेको मितिमा पानी त आएन, ठेकेदारले उल्टो धोका दियो' उनले भने।
सिँक्टाको घुलनशील माटोलाई अल्पमतमा पारौं
बैठकलाई सम्बोधन गर्ने क्रममा प्राथमिकता प्राप्त भनिएका आयोजनामा पनि सरकारी निकायले अदालतको आदेश कुरेर बस्न नहुने बताए। सरकारले उद्देश्य मुद्दा लड्ने र जित्ने भन्दा पनि आयोजना सम्पन्न गर्ने भएकाले सबैको ध्यान त्यतातिर जानुपर्ने उनको भनाइ छ।
सिँक्टा सिचाई आयोजनामा एक ठाउँमा देखिएको समस्यालाई लिएर सबै आयोजना ठप्प नपार्न आफूले निर्देशन दिइसकेको बताए।
'घुलनशील माटो भेटियो भनेर एक ठाउँमा समस्या आएको छ, अनुसन्धान र मुद्दा चल्दै गर्छ। तर त्यही ठाउँमा सय ट्रक जति अरु माटो हालिदिए त नहर बनिहाल्छ। किन मुद्दा कुरेर बस्ने। हाम्रो लक्ष्य मुद्दा होइन' उनले भने।