नेपाल वायुसेवा निगमलाई एयरबस ए३३० वाइडबडी जहाज किन्न ऋण दिएको कर्मचारी सञ्चय कोषले सुरक्षित रहेको बताएको छ।
कोषले लगानी गरिएको कुनै पनि ऋण जोखिममा नभएको प्रष्ट पारेको हो।
५८ औं वार्षिकोत्सवका अवसरमा आयोजित कार्यक्रममा बोल्दै कोषका प्रमुख प्रशासक तुलसि गौतमले नेपाल वायुसेवा निगमलाई दिइएको ऋण पूर्ण सुरक्षित रहेको दाबी गरेका हुन्।
'कर्मचारी सञ्चय कोषले नेपाल सरकारको जमानतमा नेपाल वायु सेवा निगमलाई प्रवाह गरेको कर्जाका सन्दर्भमा व्यक्त भएका चासो र चिन्ताको सम्मान गर्दै कोषको सम्पूर्ण लगानी पूर्ण सुरक्षित रहेको र निस्कृय कर्जाको अंश अत्यन्तै न्यून रहेको स्पष्ट गर्न चाहन्छु । यस सन्दर्भमा संसदीय समिति एवम् लेखापरीक्षण प्रतिवेदनबाट प्राप्त सान्र्दभिक सुझावहरुलाई आत्मसात् गर्दै कोषको लगानी प्रक्रियामा आवश्यक सुधार गर्ने प्रतिवद्धता व्यक्त गर्दछु' गौतमले भने।
सरकारी जमानतमा कोषले निगमलाई वाइडबडी जहाज किन्न १२ अर्ब ऋण दिएको छ।
जहाज किनेको एक वर्ष बढी हुँदासमेत कोषले अझै ब्याज तथा किस्ता पाएको छैन। लामो समयसम्म किस्ता तथा ब्याज नपाएपछि कोषको ऋण जोखिममा परेको भन्दै आवाज उठेको थियो। संसदीय समितिहरुले समेत यसमा चासो देखाएका थिए।