चिनियाँ राष्ट्रिपति सी चिनफिङ नेपालको दुई दिने भ्रमण सकाएर स्वदेश फर्किसकेका छन्।
उनको स्वागतको लागि सडक सुन्दर बनाउन नेपाल सरकारले सडक रंग्याउनेदेखि स्वागत गेट बनाउनेसम्म गर्यो।
सीको स्वागतको लागि एयरपोर्टदेखि सोल्टी होटलसम्मै फूलका गमला पनि राखिएको थियो।
यो क्रममा करिब ७ हजार गमला राखिएको वनस्पति विभागका महानिर्देशक धनन्जय पौडेलले जानकारी दिए।
हाल ती गमलाहरू अधिकाशं हटाइएको छ। सुरक्षाको लागि सरकारी कार्यालयहरूमा राखिएको विभागका महानिर्देशक पौडेलले बताए।
‘सडकमै राख्दा सुरक्षा र स्याहारको चुनौती भयो। त्यसैले हामीले केही गमला एयरपोर्टमा, केही राष्ट्रपति कार्यालयमा छोड्यौं’, उनले भने, ‘बाँकी गमला वनस्पति विभाग, सिहंदरबारस्थित विभागको महाशाखा र राष्ट्रिय वनस्पति उद्यानमा राखेका छौं।’
७ हजार गमलामध्ये ६ हजार ५ सय ४४ ओटा गमला भेटिएको र अरु गेटको बीचमा राखिएको, टुटफुट भएको लगायतको गमला भेरिफाइड हुन बाँकी रहेको पौडेलले जानकारी दिए।
उनका अनुसार ती गमलाहरूको मूल्य ५० लाखको हाराहारी छ।
सजावटका लागि फूल किन्न कति पैसा खर्च भयो भन्ने हिसाब अहिले नै ननिस्किएको उनी बताउँछन्।
‘आकस्मिक योजना भएकोले पैसा यकिन भएको छैन। हामीले फ्लोरीकल्चर एसोसिएसनसँग भनेर उनीहरूले फूल उपलब्ध गराएका हुन्,’ उनले भने।