मंसिर १५ गतेदेखि २४ गतेसम्म आयोजना हुने १३औं दक्षिण एसियाली खेलकुद (साग)मा सहभागी हुने वैदेशिक खेलाडी र पदाधिकारी दुर्घटना बीमा हुने भएको छ।
राष्ट्रिय खेलकुद परिषद्को सचिवालय तथा १३ औं दक्षिण एसियाली खेलकुद २०७६ को मूल आयोजक समिति र आइएमई जनरल इन्स्योरेन्स लिमिटेडबीच यस्तो सम्झौता भएको हो।
पाँच लाखका दरले सामूहिक दुर्घटना बीमा गर्ने गरी आयोजक समितिको तर्फबाट सदस्य सचिव रमेश सिलवाल र आइएमई जनरल इन्स्योरेन्सका तर्फबाट युगेशभक्त बादे श्रेष्ठले सम्झौतापत्रमा हस्ताक्षर गरेका छन्।
साग संचालन हुने समयसम्मका लागि आईएमई इन्स्योरेन्सलाई आधिकारिक बीमा प्रायोजकको रुपमा नियुक्त गरिएको पनि उक्त सम्झौतामा उल्लेख छ।
