चालु आर्थिक वर्षको पहिलो चार महिनामा ६ सय २३ किलोमिटर सडक निर्माण सकिएको सडक विभागले बताएको छ।
वर्षभरिमा २९ सय किलोमिटर सडक निर्माण गर्ने लक्ष्य लिएको विभागले पहिलो चौमासिकमा २१ प्रतिशत सडक सम्पन्न गरेको हो।
विभागले पहिलो चार महिनाभित्र ७ सय ७५ किलोमिटर सडक निर्माण गर्ने लक्ष्य लिएको थियो जसमा ८० प्रतिशत लक्ष्य पूरा गरेको छ।
त्यसैगरी, पहिलो चार महिनामा ३ सय १६ किलोमिटर सडक कालोपत्रे गर्ने लक्ष्य लिएकोमा २ सय ७७ किलोमिटर सडक निर्माण सम्पन्न भएको छ।
आर्थिक वर्षको अन्तमा १२ सय किलोमिटर सडक कालोपत्रे गर्ने विभागको लक्ष्य छ।
यस्तै, ३५८ किलोमिटर ग्राभेलस्तरको सडक निर्माण गर्ने लक्ष्य लिएको विभागले २८८ किलोमिटर सम्पन्न गरेको छ। वर्षभरिमा १२ सय किलोमिटर सडक ग्राभेल गर्ने योजना विभागले लिएको छ।
देशैभरि ५ सय किलोमिटर माटे सडक निर्माण गर्ने लक्ष्य विभागको छ। जसमा १०१ किलोमिटर पहिलो चार महिनामा सम्पन्न गर्ने लक्ष्य लिएकोमा ५८ किलोमिटर सडक निमार्ण सम्पन्न भएको छ।
पुल निमार्णमा भने विभाग लक्ष्यभन्दा अघि देखिएको छ। वर्षभरिमा ३०० पुल निर्माण सम्पन्न गर्ने लक्ष्य लिएको विभागले पहिलो चार महिनामा ५ पुल सम्पन्न गर्ने लक्ष्य बनाएको थियो। सो समयमा ३५ पुल सकिएको विभागले जानकारी दियो।