तिहार आयो बहार छायो गाउँ र घरमा
धर्तीले ल्यायो सुन्दर फूल सुहायो शिरमा
प्रेमको माला चुम्दछ गला दाजु र बैनीको
झुमेर नाचे कम्मर भाँचे न कोही ननिको।।
गुञ्जिन्छ देश मादल बजी बढाइँ गरेर
मुरली उस्तै लाउँछ भाका सुवास छरेर
रामले पनि सीताको गाउँ उचाले भैलीले
पार्वती नाचिन् शिवका छेउ रउसे शैलीले।।
भाइको आश गरेर दिदी पिँढीमा टुक्रुक्क
आशाका पाला छर्दछन् दीप छिँडीमा सुटुक्क
आँखाका नानी सबै जवानी चाडमा जुरुक्क
आउँदा भाइ दिदीको मन पर्दछ फुरुक्क।।
पीडाका बोझ असंख्य नै हुन् भेटमा छ हाँसो
अजिव चाड विश्व नै भरि नेटमा छ चासो
अमर छ यो जुगजुगदेखि कालान्तर जीवित
मानिसबीच छर्दछ प्रेम छैन यो सीमित ।।
बारीका कान्ला खेतका गरा मुसुक्क हाँसेका
बयेली खेल्दै धानका बाला फाँटमा नाचेका
पाटी र पौवा देउराली पाखा मखमली ढप्पकै
तिहार उन्छ बैनीको माया छातीमा छप्पकै।।
नेपाली माटो सुगन्ध छर्छ चाडको बिउले
हिमाली पाखो धपक्क बल्छ फूलका जिउले
नेपाली पाउ संसारभरि मादल खरीमा
घन्किन्छ देउसी चुम्दछ धर्ती उमार्छ गरिमा।।