युरोपेलली संघबाट बेलायतको बहिर्गमनको लागि तोकिएको समय ६ महिना थप गरिएको छ ।
यसअघि निर्धारित समयसिमाभित्र प्रक्रिया निश्कर्षमा नपुगेपछि अक्टोबर ३१ सम्मलाई समय थप गरिएको हो ।
युरोपेली संघका २७ सदस्य राष्ट्रहरुबीच बुधबार राती सम्पन्न बैठकले यो निर्णय गरेको हो ।
म्याद थपसंगै यहि अप्रिल १२ मा बेलायत कुनै डिल बिना संघबाट बाहिरिने सम्भावना टरेको छ ।
बेलायतकी प्रधमानमन्त्री टेरेसा मेले जुन ३० सम्मलाई म्याद थपिदिन आग्रह गरेकी थिइन् । तर संघले लामो समय थप गराएको छ ।
अक्टोबर ३१ सम्म म्याद बढाइएको भएपनि सबै प्रक्रिया पूरा भए बेलायत त्यसअघि नै संघबाट बाहिरिन पनि सक्नेछ ।
बेलायत र युरोपेली संघबीच भएको ब्रेक्जिट सम्झौताको सहमति तीन पटकसम्म मतदान गराइंदा समेत बेलायती संसदबाट पास हुन नसकेपछि प्रक्रिया अन्योलमा छ ।
ब्रेक्जिटको लागि निर्धारित पहिलो मिति मार्च २९ थियो । पहिलोपटक म्याद थप गरेर अप्रिल १२ मा सारिएको थियो ।
