शनिबार आफ्नो गृह जिल्ला काभ्रे पुगेका सञ्चार तथा सूचना प्रविधिमन्त्री गोकुलप्रसाद बाँस्कोटाले आफूले कुनै चिजको चोरी, डकैती र भ्रष्टाचार नगरेको बताउँदै चौकीदार बन्नु नै राम्रो भएको बताएका छन्।
मन्त्री बाँस्कोटाले आफूलाई कसैले चौकीदार भन्ने गरेको र कसैले हुलिया खोजेको प्रसँग उठाउँदै सो कुरा बताएका हुन।
पछिल्लो समय सरकारले ल्याएको मिडिया काउन्सिल विधेयकको प्रेस जगतले चर्को आलोचना गरिरहेको छ भने मन्त्री बाँस्कोटाले त्यसको प्रतिरक्षा गर्दै आएका छन्।
शनिबार बनेपामा आयोजित डाँडापारी सन्देश साप्ताहिकको दोस्रो वार्षिकोत्सव समारोहलाई सम्बोधन गर्दै मन्त्री बाँस्कोटाले राखेको सो भनाइ विशेषतः उनको चर्को आलोचना गरेका वरिष्ठ अधिवक्ता शम्भु थापा प्रति लक्षित थियो।
गत साता वरिष्ठ अधिवक्ता शम्भु थापाले सरकारका प्रवक्ता एवम् सञ्चार तथा सूचना प्रविधि मन्त्री गोकुल बाँस्कोटाको आलोचना गरेका थिए।
सो क्रममा उनले मिडिया काउन्सिल विधेयकको प्रतिरक्षा गरिरहेका बाँस्कोटाको व्यवहारमा थापाले प्रश्न उठाएका थिए।
'गोकुल बाँस्कोटाको हुलिया अनुसार बोलेको मिल्छ', थापाले भनेका थिए, 'गोकुल बाँस्कोटालाई हामीले चिनेको छैन? अहिले हुलिया हेर्नुहोस् त बोलेको हेर्नुहोस् त नेपाली जनतासँग डिल गर्दै हुनुहुन्छ कि हामी त एउटा गए गुज्रेको दासलाई भनेको जस्तो भन्नुहुन्छ।’
यसैगरी उनले बाँस्कोटाको रवैया हेरेर आगामी चुनावमा भोट नदिनुस् भन्न मन लाग्ने बताएका थिए।
'हामीले भन्न सक्छौँ कि सक्दैनौँ यिनलाई भोट नदेउ भनेर', थापाले भने, 'अर्कोलाई भोट देउ भन्ने पनि होइन।’
भिडियोमा हेर्नुस् शम्भु थापाले यस्तो भनेका थिएः
त्यसपछि मन्त्री परिषद्को निर्णय सुनाउन गरिएको पत्रकार सम्मेलनमा उनले थापाको अभिव्यक्तिमा सामान्य प्रतिक्रिया मात्र जनाएका थिए।
तर गृह जिल्ला पुगेका मन्त्री बाँस्कोटाले आफ्नो हुलिया सम्झन गएको आम निर्वाचनको परिणाम हेर्ने आग्रह गरे।
'हुलिया खोज्दै हिँड्नुपर्ने न म कुनै वकिल र प्रहरी होइन, मेरो जे हुलिया छ त्यो हुलिया काभ्रेपलाञ्चोक जिल्लाले बनाइदिएको छ, नपत्याए गत निर्वाचन सम्झनुस् नेपालमै दोस्रो भोट ल्याएर जितेको व्यक्ति हुँ, त्यसैले मेरो हुलिया तपाईंहरुकामाझ म यसैगरी देखाइरहन्छु', मन्त्री बाँस्कोटाले थप नबोलू भन्दै भने।
उनले आफ्नो हुलियाले कहिल्यै पनि पैसाका लागि तस्करी र राजश्व छल्नेको पक्ष लिनुपर्छ भनेर नभनेको बताउँदै थापालाई कटाक्ष गरे।
त्यसैगरी उनले आफूहरु लोकतन्त्रका निम्ति लडेको दाबी गर्दै 'जबजब श्रमिकका कुरा हुन्छन्, तबतब कम्युनिष्ट सरकार, दुईतिहाइको बहुमतको सरकारले तानाशाही दम्भ देखायो भन्दै कराउँछन्', भने ।
'अहिले जनतालाई भ्रममा पार्ने कोकोहोलो मच्चाइँदैछ', उनले थपे, 'मिडिया काउन्सिलका विषयमा बहस र विवाद चलिरहँदा के पत्रकारिता क्षेत्रमा वर्ग पक्षधरताको गन्ध छ कि छैन, यदि छैन भने व्यक्तिगत पक्षको बहसमा उत्रिर्नु नपर्ने हो ।'
मिडिया काउन्सिल विधेयक अनुसार प्रेसलाई नियमन गर्ने निकाय सरकारी एउटा अंग बन्ने र त्यसले जरिवाना गर्न नमिल्ने तर्क थापाले सोबेलामा राखेका थिए।
सो क्रममा उनले लोकतन्त्रमा ठूला र साना मिडिया सँगसँगै बाँच्न पाउनुपर्ने बताए ।
'साना मिडियाले पनि विज्ञापन पाउनुपर्छ कि पर्दैन ?' उनको प्रश्न थियो, 'काम गर्ने श्रमिकले पैसा पाउनुपर्छ कि पर्दैन?' उनले नेपाली मिडियाको क्षेत्रमा आमूल परिर्वतन गर्नु पनि जनताको चाहना रहेको उल्लेख गरे।
मन्त्री बाँस्कोटाले जनआन्दोलन २०६२-६३ मुख्य उद्देश्य समाजवाद निर्माण गर्ने लक्ष्य भएको बताउँदै समाजवादी राज्यको विशेषता तल्लो वर्गलाई पनि बाँच्न पाउने अधिकार दिनु, बोल्न , लेख्न पाउने र श्रमको मूल्य पाउने अधिकार दिनु रहेको उल्लेख गरे ।
उनले भने, 'समाजवादी न्यायअन्तर्गत समानुपातिक विज्ञापन दिने भयो भनेर एकलौटी अथवा आम्दानीको ठूलो हिस्सा आफूमा केन्द्रीत गर्नेको मन यतिबेला पोलेको हुनुपर्छ ।'
मन्त्री बाँस्काटाले कतिपय मिडिया मालिक श्रमजीवीलाई पारिश्रमिकको व्यवस्था गर्नुपर्छ र अकूत कमाइरहेको ठाउँमा रोक लाग्ला भन्दै आक्रमणमा उत्रिनसक्ने बताए ।
उनले भने, 'मिडिया विधेयक प्रचार गरेजस्तो होइन, लेखेकै आधारमा कोही कसैमाथि मुख थुन्ने, कलम थुत्ने गर्दैनौ, हामीलाई हाम्रो संविधानले त्यस्तो अधिकार दिएको छैन ।'
(राससको सहयोगमा)