गुठी विधेयकको विरोधमा आन्दोलन गर्न गठित संघर्ष समितिले बुधबार माइतीघरको विशाल प्रदर्शनपछि आगामी रणनीति तय गर्न बिहीबारबाट विद्वत वर्गसँग परामर्श गर्ने भएको छ।
सत्यमोहन जोशी, केदारभक्त माथेमा, शंकर लिम्बू, गोविन्द टन्डन लगायत संस्कृतिविद् तथा कानुनविद्हरूसँग परामर्श गरी आन्दोलनको आगामी कार्यक्रम तय गर्ने समितिका संयोजक गणपतिलाल श्रेष्ठले जानकारी दिए।
संस्कृति जोगाउन सडकमा आएका जनतामाथि दमन र अपमानित गरेको भन्दै समितिले बिहीबार राति विज्ञप्ति जारी गर्दै तीन मन्त्रीको राजीनामा मागेको छ।
जेठ २६ गते माइतीघर मण्डलमा भएको आन्दोलनमा प्रहरी परिचालन गरी लठ्ठी र पानीको फोहरा हानेको भन्दै गृहमन्त्री रामबहादुर थापाको राजीनामा मागिएको छ।
त्यस्तै, आन्दोलनकारीलाई ‘सामन्तवादी’ भनेकोमा सञ्चारमन्त्री गोकुल बाँस्कोटा र जनआवाजलाई अपमानित गर्ने अभिव्यक्ति दिनुका साथै सरोकारवालासँग परामर्श नै नगरी विधेयक ल्याएको भन्दै भूमिसुधार मन्त्री पद्मा अर्यालको राजीनामा मागिएको विज्ञप्तिमा छ।
संयोजक श्रेष्ठले बुधबार राति सेतोपाटीसँगको कुराकानीमा भने, ‘यो आन्दोलनले दुईवटा सन्देश दिएको छ– सुतिरहेका जनता जागेका छन्। उनीहरू कुनै पनि अधिनायवादी ऐन, कानुन स्वीकार गर्दैनन्। दोस्रो, अहिलेका युवाहरूमा जोश मात्र होइन, होश पनि छ।’
उनले काठमाडौंका टोल–टोलबाट जनता उठेर आन्दोलनमा संलग्न हुनु संस्कृति र सम्पदाप्रतिको सचेतना भएको बताए।
‘जब हाम्रो पहिचान र अस्मितामाथि प्रहार गर्न खोजिन्छ, हामी चुप बस्दैनौं,’ उनले भने, ‘यो एउटा विधेयकको मात्र कुरा थिएन, हाम्रो पहिचानमाथि लामो समयदेखि हुँदै आएको प्रहारविरुद्धको आन्दोलन थियो।’
पछिल्लो समय विभिन्न सरकारबाट काठमाडौं सभ्यता मासिने गरी भएका निर्णयले क्रूध काठमाडौंका जनतालाई यो विधेयकले विस्फोटनको अवस्थामा पुर्याएको उनले बताए।
यो आन्दोलन जति विशाल थियो, त्यति नै संयमित र शान्तिपूर्णसमेत रहेको उनले उल्लेख गरे।
‘एक साताअघि मात्र निर्ममतापूर्वक लठ्ठी र पानीको फोहरा हान्ने प्रहरीलाई हामीले फूल दियौं, पानी खुवायौं, केहीलाई त खाजा पनि खुवायौं,’ श्रेष्ठले भने, ‘हजारौं जनता सडकमा ओर्लेका बेला पनि एम्बुलेन्सलाई बाटो छाडेर र आफ्नो फोहोर आफैं उठाएर हामीले भद्रता पनि देखायौं।’
आन्दोलनरत जनतालाई ‘सामन्ती’ र ‘भाडामा ल्याइएका’ भनी अपमानित गरे पनि कसैले संयमता नगुमाएको उनले उल्लेख गरे।
आन्दोलनका आगामी कार्यक्रम पनि यस्तै शान्तिपूर्ण र भद्र हुने उनले बताए।
