प्रधानमन्त्री केपी शर्मा ओलीले डा.सन्दुक रुइतले आँखाको उपचार क्षेत्रमा चमत्कारिक काम गरेको भन्दै प्रशंसा गरेका छन्।
तिलगंगा आँखा प्रतिष्ठानको २५ औं वार्षिकोत्सवको अवसरमा आयोजित कार्यक्रममा बोल्दै प्रधानमन्त्री ओलीले अस्पतालका निर्देशक समेत रहेका रुइतको खुलेर प्रशंसा गरे।
‘डा.रुइतले गौरवपूर्ण इतिहास सम्झाउनु भएको छ’ ओलीले भने ‘आँखा उपचारको लागि विश्वको अग्रणी संस्था स्थापना गरेर धेरैलाई नयाँ संसार देखाउन सफल हुनुभएको छ।’
डा.रुइतको प्रयासमा अन्धोपनका धेरै बिरामीहरुले नयाँ उज्यालो संसार देख्न पाएको प्रधानमन्त्री ओलीको भनाइ छ। तिलगंगा आँखा अस्पतालको प्रेरणाबाट धेरैले सेवामुखी अस्पताल खोल्ने प्रेरणा लिनु पर्ने ओलीले बताए।
स्थापनाको २५ वर्षमै धेरै उपलब्धी हासिल गर्न सकेको भन्दै प्रधानमन्त्री ओलीले रुइत र अस्पताललाई बधाई दिए। ‘तपाईंहरुका प्रयास र सेवा अनुकरणीय छन्’ ओलीले भने। अनुसन्धान, तालिम र उपचारका लागि अस्पतालले सरकारका तर्फबाट यथेष्ट सहयोग पाउने उनले बताए।
ताप्लेजुङको ओलाङचुगोलामा जन्मेका रुइतकै इच्छाशक्तिले हालको तिलगंगा अस्पताल खुलेको हो। त्रिपुरेश्वर आँखा अस्पतालमा काम गर्दै गर्दा रुइत अध्ययनका क्रममा अष्ट्रेलिया पुगे। अष्ट्रेलिया अध्ययनपछि उनले नेपालमै आएर आँखा अस्पताल संचालन गर्ने इच्छा गर्दै विभिन्न क्षेत्रबाट सहयोग समेत जुटाए।
उनकाे अभियानलाइ अस्ट्रेलियाका डा. हलोजले साथ दिए। यो अस्पताल खोल्न अस्ट्रेलियास्थित फ्रेड हलोज फाउन्डेसन, नेपालका समाजसेवी तथा साहित्यकार जगदीश घिमिरे, कलाकार मदनकृष्ण-हरिवंश, उद्यमी रवीन्द्र श्रेष्ठ, सुहृत घिमिरे, उद्योगपति दिवाकर गोल्छा, सगरमाथा आरोही शम्भु तामाङ र डा रीता गुरुङलगायतले साथ दिएका थिए।
