प्रधानमन्त्री केपी शर्मा ओली उपचारका लागि सिंगापुर गएका छन्। बिहीबार दिउँसो साढे १ बजे उनी थाई एयरबाट सिंगापुरका लागि प्रस्थान गरेका हुन्।
सिंगापुर जानुअघि उनकी निजी चिकित्सक दिव्या सिंहले प्रधानमन्त्रीमा मिर्गौलासम्बन्धी एन्टीबडी बढेको बताएकी छन्।
सिंहका अनुसार एन्टिबडीलाई शरीरबाट निस्कासन गरी निराकरण गर्ने उपचार विधिको निरन्तरताका लागि प्रधानमन्त्री सिंगापुर गएका हुन्।
सिंगापुरको नेसनल युनिभर्सिटी अस्पतालमा विज्ञ चिकित्सकले प्रधानमन्त्रीको मिर्गौलाको परीक्षण गर्ने र क्षमता अभिवृद्धिका लागि आवश्यक उपचार गर्ने सिंहले जानकारी दिएकी छन्।
डाक्टर सिंह पनि प्रधानमन्त्रीसँगै सिंगापुर गएकी गएकी छन्।
प्रधानमन्त्री फेरि सिंगापुर जान लागेपछि सेतोपाटीका सन्जिब बगालेले वरिष्ठ मिर्गौला रोग विशेषज्ञ ऋषिकुमार काफ्लेसँग प्रधानमन्त्रीलाई हुनसक्ने समस्या र सम्भावित उपचारबारे कुराकानी गरेका छन्। डाक्टर काफ्ले २०७२ सालसम्म ओलीको स्वास्थ्य जाँच गर्थे।
डाक्टर काफ्लेसँग गरिएको कुराकानीको सम्पादित अंश:
उपचारका लागि प्रधानमन्त्री ओली बिहीबार सिगांपुर जान लागेको कुरा मैले सञ्चारमाध्यमबाट थाहा पाएँ।
पछिल्लो समय प्रधानमन्त्रीको स्वास्थ्य जाँच नगरेकाले उहाँको सबै अवस्था भन्न सक्दिनँ तर सञ्चारमाध्यममा आएको जानकारीका आधारमा उहाँको मिर्गौलामा समस्या देखिएको बुझिन्छ। अर्थात् उहाँको शरीरमा क्रियाटिन बढ्यो।
क्रियाटिन बढ्नु भनेको १२ वर्षअघि प्रत्यारोपण गरिएको मिर्गौलालाई उहाँको शरीरले रिजेक्ट (अस्वीकार) गर्यो। मिर्गौला बिग्रिन थाल्यो। अब बिस्तारै उहाँको मिर्गौलाले कम काम गर्न थाल्छ।
त्यही कारण उहाँ पहिलो पटक सिंगापुर जानुभयो होला। सिंगापुरमा के गरियो, के गरिएन, कस्तो उपचार गरियो? कुनै जानकारी गराइएको छैन। फेरि सिंगापुर जान पर्नु भनेको मिर्गौलामा देखिएको समस्या निरकारण भएन भन्ने हो।
अब प्रश्न उठ्छ- बढेको क्रियाटिन सामान्य अवस्थामा फर्किएला?
प्रधानमन्त्रीका लागि क्रियाटिन घटाउने पहिलो विकल्प हुन्छ। त्यसका लागि कुन विधि अपनाउने भन्ने बिरामीको अवस्था हेरेरमात्र भन्न सकिन्छ।
१२ वर्ष अगाडि उहाँको मिर्गौला प्रत्यारोपण भएको थियो। अहिले उहाँको मिर्गौलाले कम काम गर्न थाल्यो। यदि उपचार गरेर सामान्य अवस्थामा फर्किन सकेन भने पनि २-४ वर्ष त यही मिर्गौला जान सक्छ।
अहिले नै प्रत्यारोपण गरिएको मिर्गौला झ्याप्पै गएर अर्को प्रत्यारोपण वा डायलोसिस नै गरिहाल्नुपर्ने अवस्था हुँदैन। उहाँको अन्य अवस्था ठीक छ। मुटु, मस्तिष्क तथा नसामा कुनै समस्या छैन। क्यान्सरजस्ता उपचार गर्न नसक्ने रोग पनि उहाँलाई छैन। यसले गर्दा पुनः प्रत्यारोपण गर्न नसकिने स्थिति देखिँदैन।
प्रत्यारोपण नै गर्ने हो भने अहिले बढेको क्रियाटिनलाई नघटाए पनि हुन्छ। किनकी क्रमिक रूपमा रिजेक्सनलाई छोड्दै लगेर जब सबै रिजेक्सन हुन्छ त्यसपछि प्रत्यारोपण गर्न सकिन्छ।
उपचार गर्ने चिकित्सकले तपाईंको मिर्गौला बिग्रियो, तपाईं फेरि प्रत्यारोपणमा जानुस् भनेर एकैचोटी भन्दैन। उसले प्रयास गरिन्छ नै भन्छ।
सबैभन्दा पहिला त अहिलेको मिर्गौलालाई सामान्य बनाउने प्रयास हुन्छ। सिंगापुर भ्रमण यही प्रयासका लागि होला।
मिर्गौला फेरि प्रत्यारोपण गर्नु परे पनि प्रधानमन्त्री मानसिक रूपमा बलियो हुनुहुन्छजस्तो लाग्छ। किनकी उहाँ साहसिक र हिम्मतिलो मान्छे हो। उहाँको मिर्गौलाले जतिबेला काम गर्न छोडेको थियो त्यतिबेला पनि उहाँमा ठूलो आत्मबल थियो।
त्यतिबेला उहाँ भन्नुहुन्थ्यो-म रोगी भएर डायलोसिसमा बस्न चाहन्नँ, स्वतन्त्र हुन चाहन्छु।
मिर्गौला प्रत्यारोपण गरेपछि पनि उहाँले भेटघाट क्रममा सतर्कता अपनाउनुभएन। कतिपय अवस्थामा लापरबाही गर्नुभयो, गम्भीर संक्रमणमा पर्नुभयो तर पनि पेल्नुभयो।
नेतृत्वदायी भूमिकामा बसेको भएर पनि होला उहाँमा डर छैन। प्राय: बिरामीमा मलाई केही भइहाल्छ की भन्ने हुन्छ तर उहाँ मलाई केही हुन्न ठीक हुन्छ भन्ने पक्षमा जानुहुन्थ्यो। अहिले पनि केही अप्ठेरो पर्यो भने प्रत्यारोपणकै निर्णय लिनुहुन्छ जस्तो मलाई लाग्छ।
उपचारका लागि प्रधानमन्त्रीले किन सिगांपुर रोज्नुभयो होला?
१२ वर्षअघि उहाँले मिर्गौला प्रत्यारोपण हुँदा दिल्ली नेपालमा यस्तो सुविधा थिएन।
अहिले धेरै जनाले यहीँ प्रत्यारोपण गरेका छन्। ११ वर्षमा १५ सय बढीले मिर्गौला प्रत्यारोपण गरिसकेका छन्। प्रत्यारोपणपछि अहिले प्रधानमन्त्रीलाई देखिएजस्तो रिजेक्सन भएका व्यक्तिहरूले पनि यहीँ उपचार गरिरहेका छन्।
प्रधानमन्त्री भएकाले नयाँ प्रविधिले उपचार गर्ने ठाउँमा जान सुझाव दिइएको हुन सक्छ, जुन स्वभाविक पनि हो।
अत्याधुनिक प्रविधि भएको र नजिकै भएकाले प्रधानमन्त्रीले सिंगापुर रोज्नुभएको होला। नयाँ प्रविधि, नयाँ तरिका अनि नयाँ उपचारको प्रयास गर्यो भने सजिलो होला भनेर यस्तो गरेको हुनसक्छ। तर जो मान्छे जता दौडिए पनि बिग्रिन थाल्यो भने थाम्न सकिँदैन। यहाँ बिग्रिन थालेकालाई हामीले ठीक पारेका छौं भने उहाँलाई नसक्ने भन्ने होइन।
