पूर्व प्रधानमन्त्रीहरु शेरबहादुर देउवा र डा. बाबुराम भट्टराईले कुटनीतिक मर्यादा नाघेर भारतीय विदेशमन्त्री एस जयशंकरसँग भेटघाट गरेको विषयमा राप्रपाका अध्यक्ष कमल थापा र भट्टराईबीच जुहारी चलेको छ। देउवा र भट्टराई भारतीय विदेशमन्त्री जयशंकरलाई भेट्न बिहिबार उनी बसेकै होटेलमा पुगेका थिए।
जयशंकरसँगको भेटघाटको सो समाचार सार्वजनिक भएपछि राप्रपाका अध्यक्ष कमल थापाले देउवा, भट्टराई र उपप्रधानमन्त्रीसमेत रहेका स्वास्थ्यमन्त्री उपेन्द्र यादवले कुटनीतिक मर्यादा र स्वाभिमानलाई उपेक्षा गर्दै लम्पसारबादको नमुना पेश गरेको टिप्पणी गरेका थिए।
ट्वीटरमार्फत् आएको कमल थापाको टिप्पणीलाई ट्वीटरमै जवाफ दिँदै समाजवादी पार्टीका अध्यक्ष समेत रहेका पूर्वप्रधानमन्त्री भट्टराईले देशको हितमा छिमेकीसँग खुल्ला सम्बन्ध राख्ने पक्षमा आफू रहेको बताएका छन्। उनले भनेका छन् ‘सिसाको घरमा बस्नेले अर्काको झुपडीमा ढुंगा हान्नुहुँदैन भन्ने लोकोक्ति मेरा सहपाठी मित्रले स्मरण गर्नु राम्रो होला! सुगौलीसन्धी यताका शासकले भित्र दिल्लीको चाकरी गर्ने र बाहिर राष्ट्रवादको डंका पिटेर जनता ठग्ने विरासत तोड्दै हामी छिमेकीसँग देशको हितमा खुलासम्बन्ध राख्ने पक्षमा छौं!’
भट्टराईको जवाफलाई फेरि थापाले प्रतिउत्तर दिँदै खुल्ला र मित्रतापूर्ण सम्बन्ध बारे आफू सहमत रहेको ट्वीट लेखे। ‘खुला मित्रतापूर्ण सम्बन्धवारे मेरो मित्रको धारणासंग सहमत छु। त्यस्तो सम्बन्ध समानता, स्वाभिमान र मर्यादाभित्र रहोस् र सुगौली सन्धिपछि धेरै लामोसमय कायम आत्मसमर्पण अन्तहोस् भन्ने मेरो मान्यता हो। सम्मानित पूर्वप्रमले एक विदेशी मन्त्रीलाई उसकै होटलमा औपचारिक रुपमा भेटेको अलि सुहाएन कि?’
थापाको यो प्रतिक्रियामा भट्टरााईले जवाफ दिइसकेका छैनन्। बिहीबार भारतीय विदेशमन्त्री एस जयशंकरलाई भेट्न पूर्वप्रधानमन्त्रीहरु देउवा, भट्टराई र वर्तमान उपप्रधनमन्त्री उपेन्द्र यादव उनी बसेकै होटेलमा पुगेका थिए। उनीहरुको यो भेटघाट कुटनीतिक मर्यादाबिपरित भएको भन्दै सामाजिक सञ्जालमा आलोचना भएको छ।
यो पनि पढ्नुहोस्,
प्रोटोकल नमिल्ने भन्दै प्रचण्ड र नेपालले जयशंकरलाई भेटेनन्, देउवा र भट्टराई होटलमै पुगे
प्रोटोकल अनुसार कुनै देशको विदेश मन्त्रीलाई होटलमा गएर भेट्न नमिल्ने भन्दै पूर्वप्रधामन्त्रीहरू पुष्पकमल दाहाल ‘प्रचण्ड’ र माधवकुमार नेपालले भारतका विदेशमन्त्री एस जयशंकरलाई भेटेनन्।
बुधबार नेपाल आएका जयशंकर बत्तिसपुतलीस्थित होटल द्वारिकाजमा बसेका थिए।
उनले सत्तारूढ नेपाल कम्युनिष्ट पार्टीका अध्यक्षसमेत रहेका प्रचण्डलाई बिहान ८ बजे र त्यसपछि माधवकुमार नेपाललाई आफू बसेकै होटलमा भेट्न निम्ता पठाएका थिए।
पूर्वप्रधानमन्त्री एवम् पार्टीको अध्यक्ष र वरिष्ठ नेताको हैसियतमा अर्को मुलुकमा विदेश मन्त्रीलाई भेट्न जानु कूटनीतिक मर्यादाविपरीत हुने भन्दै भेट अस्वीकार गरेका हुन्।
नेपालभन्दा अगाडि बोलाइएका प्रचण्डले आफू नजाने बताएपछि नेपालले पनि सोही आधारमा जयशंकरका तर्फबाट आएको निम्तो अस्वीकार गरेको उनी निकट स्रोतले बताएको छ।
पूर्वप्रधानमन्त्रीहरू शेरबहादुर देउवा र डाक्टर बाबुराम भट्टराई भने भारतीय विदेशमन्त्रीलाई जयशंकरलाई भेट्न उनी बसेको द्वारिकाज होटेलमै पुगेका थिए।
जयशंकरसँग देउवाले बिहीबार दिउँसो १२ बजे भेटेका थिए।
यसअघि गत जेठमा कांग्रेस सभापति देउवाले भारतीय विदेशमन्त्री नियुक्त भएकोमा जयशंकरलाई बधाई दिएका थिए। प्रोटोकल बाहिर गएर बधाई दिनु अशोभनीय भएको भन्दै देउवाको आलोचना भएको थियो।
जयशंकरले बाबुराम भट्टराईले १ बजेतिर भेटेका थिए।
जयशंकरलाई भेट्न बाबुराम भट्टराईसँगै उपप्रधान तथा स्वास्थ्यमन्त्री एवम् समाजवादी पार्टीका अध्यक्ष उपेन्द्र यादव पनि सँगै गएका थिए। नेपाल भारत संयुक्त आयोगको बैठकमा सहभागी हुन बुधबार नेपाल आएका जयशंकरले पहिलो भेट प्रधानमन्त्री केपी शर्मा ओलीसँग गरे।
उनले बुधबार दिउँसो सामूहिक रूपमा र एक्लै प्रधानमन्त्रीसँग करिब २ घण्टा भेटघाट गरेका थिए। प्रधानमन्त्री ओली र जयशंकरको कुराकानी लम्बिएकै कारण बुधबार दिउँसो २ बजे सुरू हुने भनिएको आयोगको बैठक झण्डै २ घण्टा ढिलो गरेर ५ बजेमात्रै सुरू गरिएको थियो।
यसैगरी, जयशंकरले बुधबार साँझ राष्ट्रिय जनता पार्टीको अध्यक्ष मण्डलको टोलीलाई भेटेका थिए। उनले बिहीबार बिहान राष्ट्रपति विद्यादेवी भण्डारी भेटेका हुन्।
२०७२ सालमा भारतका तत्कालीन प्रधानमन्त्री नरेन्द्र मोदीको सरकारले नेपाललाई नाकाबन्दी लगाउँदा तत्कालीन भारतीय विदेश सचिव रहेका जयशंकरको विवादास्पद भूमिका खेलेका थिए।