प्रदेश नम्बर १ सरकारले आफ्नो प्रदेशका १४ जिल्लाका प्रमुख जिल्ला अधिकारी (सिडिओ) सँग भिडिओ संवाद सुरू गरेको छ।
आन्तरिक मामिला तथा कानुन मन्त्रालयले मंगलबार एकैपटक १४ सिडिओहरूसँग संवाद गरी आवश्यक निर्देशन दिएको हो। आन्तरिक मामिला मन्त्री हिक्मतकुमार कार्कीले सिडिओहरूसँग जिल्लाको समग्र अवस्था बुझेपछि निर्देशन दिएका थिए।
इन्टरनेटमार्फत भिडिओ वार्ता सुरू भएपछि सिडिओ र प्रदेश सरकारबीच काम कारबाहीमा थप सहजता आउने मन्त्रालयको दावी छ। ‘मन्त्रालय र १४ वटै जिल्ला प्रशासन कार्यालयमा भिडिओका लागि नेटवर्किङ मिलाइएको छ,’ मन्त्रालयका प्रवक्ता कमलबहादुर थापाले सेतोपाटीसँग भने।
एकैपटक १४ जिल्लाका सिडिओ र मन्त्रीबीच कुराकानी गर्न सकिने उनले बताए। ‘मंगलबार १४ सिडिओ र मन्त्रीज्यूबीच कुराकानी गरियो,’ उनले भने, ‘एकैपटक सबैसँग छलफल गर्दा समयको बचत भयो। प्रविधि प्रयोगबाट प्रदेशको खर्च पनि कम भयो, जिल्ला–जिल्ला धाइराख्नुपरेन।’
प्रधानमन्त्रीले मन्त्रीहरूसँग सिंगापुरबाट भिडिओ वार्ता गरेजस्तै प्रविधि जडान गरिएको थापाले दाबी गरे। ‘प्रधानमन्त्रीले सिंगापुरबाट गर्नुभएको भिडिओ संवादजस्तै हो,’ उनले भने, ‘यो सुरक्षित प्रविधि नै हो।’ मन्त्री वा मुख्यमन्त्रीले सिधै सिडिओसँग भिडिओ वार्ता गर्ने उनले बताए।
‘विशेषगरी विपदका बेला भिडिओ सम्बाद प्रभावकारी हुन्छ,’ उनले भने, ‘सिडिओ र जिल्लाका सुरक्षा निकायसँग जिल्लाका अवस्थाको बारेमा जानकारी लिने र एकैपटक सबै जिल्लामा निर्देशन दिन सकिन्छ।’ टेलिफोनबाट भन्दा भिडिओबाट कुराकानी प्रभावकारी हुने उनले बताए।
