प्रमुख प्रतिपक्षी दल नेपाली कांग्रेसका सांसद राधेश्याम अधिकारीले डेंगी संक्रमण नियन्त्रण गर्न सरकारले ध्यान नदिएको बताएका छन्।
५६ जिल्लामा डेंगीका बिरामी देखिएको भन्दै उनले बुधबार राष्ट्रियसभामा भने, ‘५६ जिल्लामा डेंगीका बिरामी छन्। राष्ट्रिय महामारी हो कि होइन? विपत्ति मान्नु पर्ने हो कि होइन? सरकार के गर्दैछ?’
उनले स्वास्थ्य तथा जनसंख्या मन्त्रालयले पनि आफ्नो जिम्मेवारी पूरा गर्न नसकेको बताए।
डेंगी संक्रमण हुने र यसबाट बच्ने उपायबारे सचेतना जगाउनुपर्ने उनले बताए। ‘डेंगीले त्रास र भयको सिर्जना गरेको छ तर सरकारबाट आधिकारिक कुरा आएको छैन,’ उनले भने।
डेंगी परीक्षण गर्दा लाग्ने शुल्क पनि महँगो भएको उनको भनाइ छ।
‘चितवनका निजी अस्पतालले डेंगीको परीक्षण गर्दा दुई हजार छ सय लिने रहेछन्। प्रशानसनले एक हजारमात्रै लिन पाउने भनेको रहेछ। तीन सय ५० रुपैयाँको किटले हुने उपचार यति महँगो किन?,’ उनले प्रश्न गरे।
डेंगीले धनी र शक्तिशालीहरूलाई पनि नछाडेको उनको भनाइ छ।
‘कति मान्छे मरेपछि डेंगीले महामारीको रूप लिने हो?,’ उनले प्रश्न गरे, ‘भर्खर चार/पाँच जनाको मृत्यु भएको भनेर हेलचेक्रयाइँ गरिएको रहेछ।’
