बेलायती प्रधानमन्त्री बोरिस जोनसनले पाँच साताका लागि गरेको संसद निलम्बनलाई स्कटल्याण्डको एक उच्च अदालतले गैरकानुनी ठहर गरेको छ।
उच्च अदालतका तीन न्यायाधीशको इजलासले प्रधानमन्त्री जोनसनको उक्त कदमलाई संसद छल्ने अनुचित मनसायबाट प्रेरित भएको उल्लेख गरेको छ।
जोनसोनको कदमविरूद्ध स्कटल्याण्डको नेसनल पार्टीका नेताहरूले दिएको मुद्दाको पक्षमा अदालतले बुधबार यस्तो आदेश गरेको हो।
जोनसनले सेप्टेम्बर ९ देखि अक्टोबर १४ सम्म संसद निलम्बन गरेका छन्।
जोनसन युरोपियन युनियनबाट बेलायतलाई अक्टोबर ३१ सम्म अनुसार जसरी पनि निकाल्ने (ब्रेक्जिट) बाचा गरेर प्रधानमन्त्री बनेका थिए।
इयूसँग डिल नगरेरै भए पनि बेलायतलाई इयूबाट अलग गर्ने जोनसनको योजना छ। धेरै सांसदहरू त्यसका पक्षमा छैनन्।
आफ्नो प्रस्तावमा सांसदहरूले विरोध गर्ने समय नपाऊन् भनेर जोनसनले संसद निलम्बन गरेको विपक्षीहरूको आरोप छ।
जोनसनको सरकारले स्कटिस उच्च अदालतको आदेशविरूद्ध सर्वोच्च अदालत जाने बताएको बीबीसीले उल्लेख गरेको छ।
शुक्रबार लण्डनको उच्च अदालतले सहमतिबिनाको ब्रेक्जिट गर्न जोन्सनले यति लामो संसद निलम्बन गरेको भन्दै परेको मुद्दा अस्वीकार गरेको थियो।
बेलायती प्रधानमन्त्रीले नयाँ अधिवेशन सुरू हुनुभन्दा अघि केही समय संसद निलम्बन गर्ने कानुनी व्यवस्था छ। यस्तो व्यवस्था अनुसार अहिलेसम्म बढीमा २० दिनसम्म संसद निलम्बन भएको थियो।