चिनियाँ राष्ट्रपति सी चिनफिङको स्वागत र विदाइका बेला काठमाडौंस्थित सरकारी कार्यालयका निजामती कर्मचारीलाई पनि सडकमा राखिने भएको छ।
राष्ट्रपति सी दुई दिने राजकीय भ्रमणका लागि शनिबार अपरान्ह नेपाल आउँदैछन्।
सीको स्वागत र विदाइमा माइतीघरदेखि बानेश्वरसम्म कर्मचारी राख्न लागिएको हो।
निजामती कर्मचारीहरूको आधिकारिक ट्रेड युनियनका अध्यक्ष पुण्यप्रसाद ढकालका अनुसार राष्ट्रपति सीको स्वागतका लागि कर्मचारीलाई शनिबार अपरान्ह ३ बजे उपस्थित भइसक्न निर्देशन आएको छ।
‘राष्ट्रपति सिको स्वागतका लागि ३ बजे उपस्थित भइसक्नुपर्ने भनिएको छ,’ उनले सेतोपाटीसँग भने, ‘पहिले साढे ३ बजे पुग्नुपर्ने भन्ने थियो। अहिले आधा घन्टा छिटो नै आइपुग्नु भन्ने छ।’
संघीय मामिला तथा सामान्य प्रशासन मन्त्रालयका सचिव यादवप्रसाद कोइरालाका अनुसार राष्ट्रपति सीको स्वागतका लागि कर्मचारी आउने भएकोले ठाउँ तय गरिएको छ।
‘राष्ट्रपति सीको स्वागतका लागि कर्मचारी उपस्थित भइहाल्छन् नि! कर्मचारी उपस्थित हुने भएकोले स्वागत र विदाइका लागि स्थान पनि तोकिएको होला,’ उनले सेतोपाटीसँग भने।
शनिबार भारतको चेन्नईबाट काठमाडौं ओर्लन लागेका सी आइतबार १ बजे स्वदेश फर्कने कार्यक्रम छ।
