प्रधानमन्त्री केपी शर्मा ओलीको सचिवालयबाट ६ जना एकसाथ बाहिरिएका छन्।
बिदा हुनेमा अधिकांश प्रेससँग सम्बन्धित टोली छ। प्रेस सल्लाहकार कुन्दन अर्याल, प्रेस संयोजक चेतन अधिकारी, फोटो पत्रकार कृष्ण पौडेलले सचिवालय छाडेका हुन्।
त्यस्तै जनसम्पर्क सल्लाहकार अच्युत मैनाली, विकास विज्ञका रुपमा नियुक्ति लिएका घनश्याम भट्टराई, प्रधानमन्त्रीका सम्बोधनहरू तयार पार्ने (डिकोडर) उदय पोखरेल छन्।
उनीहरुले मंसिर १ गतेदेखि लागू हुनेगरी यसअघि राजीनामा दिएका थिए। ‘प्रधानमन्त्रीलाई सेवा आवश्यक हुने रहनु भएको छ’ सचिवालयका एक सदस्यले भने, ‘सेवा आवश्यक नठान्नु भएकाहरु बाहिरिनु भएको छ।’
तर सचिवालयबाट बाहिरिएकाहरुलाई पछिल्लो समय प्रधानमन्त्री ओलीसँग भेटघाट गर्न दिइएको थिइएन। ‘हाम्रो प्रधानमन्त्रीसँग कुनै कुरा भएको छैन’, सचिवालयबाट बाहिरिने मध्येका एकले सेतोपाटीसँग भने, ‘प्रधानमन्त्रीले सामान्यता बालुवाटारको माथिल्लो तल्लामा भेटघाट गरिरहनु भएको छ। त्यहाँ हामीलाई जान दिइएको थिएन। बाहिरिने विषयमा प्रधानमन्त्रीसँग कुनै कुराकानी भएको छैन।’
प्रधानमन्त्रीका प्रमुख सल्लाहकार विष्णु रिमाल, परराष्ट्र सल्लाहकार राजन भट्टराई प्रधानमन्त्रीले यथावत् राखेका छन्।
