सरकारद्वारा प्रतिबन्धित नेत्रविक्रम चन्द (विप्लव) समूहले कपिलवस्तुबाट बरामद गरिएका हतियार आफ्नो नभएको बताएको छ।
विप्लवका राप्ती ब्युरो इञ्चार्ज ‘समर’को नामबाट आइतबार जारी गरिएको विज्ञप्तिमा त्यो दाबी गरिएको हो। उनले ती हतियार प्रहरी आफैंले राखेर पार्टीलाई दमन गर्ने षड्यन्त्र गरिएको दाबी गरेका छन्।
‘नेकपामाथि दमन गर्ने योजनाअनुरुप प्रहरी आफैंले हतियार राखेर भ्रमपूर्ण प्रचार गराइएको स्पष्ट पार्न चाहन्छौं,’ समरले विज्ञप्तिमा भनेका छन्। उनले सरकारले नियोजित, कपोलकल्पित र भ्रमपूर्ण प्रचार गराइएको दाबी गरेका छन्।
५ नं. प्रदेश प्रहरी कार्यालय तुलसीपुर दाङ, जिल्ला प्रहरी कार्यालय घोराही र ईलाका प्रहरी कार्यालय गढवाको विशेष टोलीले गोप्य सूचनाको आधारमा सिमाना क्षेत्रमा खोज्दै जाँदा कपिलवस्तु जिल्लाको शिवराज नगरपालिका वडा नं. १ बाट ५ थान एसएमजी, त्यसमा प्रयोग हुने १३ थान म्यागजिन र ३९० थान गोली बरामद गरेको थियो।
प्रहरीले ती हतियार र गोली विप्लव समूहको भएको दाबीका साथ पत्रकार सम्मेलन गरेको थियो।
