कर्णाली प्रदेशका सांसदहरूले साझा मुद्दाहरूमा एकजुट भएर अघि बढ्ने प्रतिवद्धता जनाएका छन्।
वीरेन्द्रनगरमा मंगलबार भएको एक छलफलमा सहभागी सांसदहरूले साझा मुद्दाहरूमा सत्तापक्ष र प्रतिपक्षका नभनी एकजुट भएर अघि बढ्ने प्रतिबद्धता जनाएका हुन्।
प्रदेशसभा सदस्य हिमबहादुर शाहीले समाजमा रहेका कुसंस्कार तथा सीमान्तकृत समुदायको विषयमा एकजुट भएर आवाज उठाउने गरेको बताउँदै अबका दिनमा पनि साझा विषयमा एकजुट भएरै लाग्ने बताए।
‘हामीले अहिलेसम्म साझा विषय भएको खण्डमा सत्तापक्ष र प्रतिपक्ष नभनेर एउटै आवाज उठाएका छौं, यो निरन्तर हुनेछ,’ उनले भने।
सीमान्तकृत समुदायका पक्षमा सदनमा सांसदहरूले उठाएका विषय कार्यान्वयनको चरणमा रहेको उनले बताए।
सांसद बद्मीकुमारी बोहोराले प्रदेशका सबै सांसदको पहलमा नै ‘छोरीबुहारी छात्रवृत्ति’ कार्यक्रम ल्याउन सफल भएको बताइन्।
‘कर्णालीका सबै महिला सांसदले आवाज उठाएपछि छोरी–बुहारी छात्रवृत्ति कार्यक्रमको सुरूआत भएको हो,’ उनले भनिन्, ‘लैंगिक दृष्टिकोणले हेर्दा महिलाको शिक्षाको अवस्था पछाडि परेको देखिएको भएर नै यो कार्यक्रम ल्याउन हामीले पहल गरेका हौं।’
सांसद पद्मा खड्काले आफू र आफ्नो क्षेत्रसँग सम्बन्धित सवालमा मात्र आवाज उठाउने भन्दा पनि साझा विषयलाई विशेष जोड दिनुपर्ने बताइन्।
‘जसको सवाल छ उसैले मात्र आवाज उठाउनेभन्दा पनि सबै साझा विषयमा सांसद एकजुट हुन आवश्यक छ, हामी यो गर्नेछौं,’ उनले भनिन्।
सांसद अमृता शाहीले जनताका दबिएका आवाजहरूलाई संसदबाट उठाउने प्रतिबद्धता जनाइन्।
‘कर्णालीका धेरै समुदाय, नागरिकका आवाज अहिले पनि दबेको अवस्थामा छन्,’ सांसद शाहीले भनिन्, ‘यी दबिएका आवाजहरूलाई हामीले सदनबाट बुलन्द गरेर न्याया दिलाउँनेछौं।’