बुधबार उत्तर कोरियाका सरकारी सञ्चारमाध्यमले नेता किम जोङ उनको एउटा नयाँ तस्बिर सार्वजनिक गरेका छन्। तस्बिरमा उन हिउँले सेताम्य पहाडमा श्रीमती र अन्य सैन्य अधिकारीसँग घोडामा चढेर गइरहेको देखिन्छन्।
चीनसँग सीमा जोडिएको माउन्ट पेक्टुमा उन यसअघि अक्टोबरमा पनि घोडा चढेर गएका थिए।
कुनै ठूलो परिवर्तन गर्नुअघि त्यसको संकेत दिन कोरियाली शासकहरू माउन्ट पेक्टु पुग्ने गर्छन्। पेक्ट पहाड कोरियाली अधिराज्य स्थापना गर्ने पौराणिक पात्र दाङगुनको जन्मस्थान मानिन्छ। दाङगुन ४ हजार वर्षअघि जन्मिएको जनविश्वास छ।
यही पहाडमा उनका हजुरबुवा किम इल सङले जापानी उपनिवेशविरूद्ध क्याभलरी युनिटको नेतृत्व गरेका थिए।
बुधबार उनले आफ्ना हजुरबुवाले लगाउनेजस्तै कोट लगाएका थिए। त्यसबाट उनले आफ्नो परिवार उत्तर कोरियाको स्वतन्त्रता र उपनिशविरूद्ध लड्ने परिवार भएको सन्देश दिन चाहेको देखिन्छ।
यसपालिको उनको यात्राको अर्को सन्देश अमेरिकालाई हो।
कोरियाको मजदुर पार्टीको महत्वपूर्ण बैठक केही दिनमा बस्दैछ। उक्त बैठकले अमेरिकासँगको अनआणविकीकरण वार्ताबारे महत्वपूर्ण निर्णय लिने अपेक्षा गरिएको छ।
उनले पछिल्लो समय अमेरिकासँगको वार्तामा अवरोध आइरहेको र अमेरिका वार्तामा गम्भीर नभए आफूले नयाँ बाटो अबलम्बन गर्ने चेतावनी दिँदै आएका छन्। यसपालिको घोडा सवारीबाट उनल अमेरिकालाई आफ्नो नयाँ वर्षको सम्बोधनका क्रममा त्यो नयाँ बाटो अपनाउन सक्ने संकेत गरेको विश्लेषकहरूले बताएका छन्।
