नेपाली कांग्रेसले आइतबार दिउँसो १ बजेका लागि डाकेको केन्द्रीय कार्यसमिति बैठकमा बरिष्ठ नेता रामचन्द्र पौडेल पक्षका केन्द्रीय सदस्य उपस्थित नहुने भएका छन्।
नेता पौडेल परिवारसहित पाथिभरा दर्शनका लागि गएका छन् भने उनीपक्षका अरू केन्द्रीय सदस्य बैठकमा सहभागी नहुने निर्णयमा पुगेका हुन्।
सभापति शेरबहादुर देउवा १४ औं महाधिवेशनको कार्यतालिका प्रकाशित गर्न सहमत नभएको भन्दै पौडेल पक्षका नेताहरूले बैठक बहिष्कार गर्ने बताएका हुन्।
गत बिहीबार बसेको बैठक पनि पौडेल पक्षका नेताले बहिष्कार गरेका थिए। बैठकमा सभापति देउवाले ४१ विभाग गठन गर्नेलगायत ९ एजेन्डा पेश गरेका थिए। ती एजेन्डामाथि छलफल गर्न आइतबार केन्द्रीय समिति बस्न लागेको हो।
महामन्त्री शशांक कोइराला र पूर्वमहामन्त्री प्रकाशमान सिंहबीच केहीबेर अघि भएको छलफलपछि आज पनि बैठक बहिष्कार गर्ने निर्णय भएको हो।
सिंहका सहयोगी यूपी लामिछानेका अनुसार बरिष्ठ नेता पौडेल काठमाडौं फर्केपछि मात्रै थप निर्णय हुनेछ। ‘आज साँझ बरिष्ठ नेता काठमाडौं आएपछि थप छलफल हुन्छ,’ नेताहरूलाई उद्धृत गर्दै लामिछानेले भने।
आइतबार नै उपसभापति विमलेन्द्र निधिले महामन्त्री शशांक कोइरालासँग छलफल गरी सहमतिमै अघि बढ्ने बताएका थिए।
शनिबार साँझ निधि र पूर्वमहामन्त्री सिंहबीच पनि छलफल भएको थियो।
सभापति देउवा शनिबार विहान बोहराटारस्थित निवास पुगेर बरिष्ठ नेता पौडेलसँग भलाकुसारी गरेका थिए।
१४ औं महाधिवेशनको कार्यतालिका बैठकका एजेन्डा नबनेसम्म आफूहरू केन्द्रीय समिति बैठकमा उपस्थित नहुने पौडेलले अडान राख्दै आएका छन्।