सत्तारूढ नेपाल कम्युनिष्ट पार्टी नेकपाको स्थायी कमिटी बैठकमा अध्यक्ष पुष्पकमल दाहाल प्रचण्डले राजनीतिक प्रतिवेदन पेश गरेका छन्।
वर्तमान परिस्थिति, राजनीतिक घटनाक्रम, पार्टीको आगामी नीतिलगायत विषय समेटिएको प्रतिवेदन प्रचण्डले पेश गरेका हुन्।
आइतबार दिउँसो पार्टी कार्यालय धुम्बाराहीमा बसेको बैठकमा प्रचण्डले १६ पृष्ठको प्रतिवेदन पेश गरेका थिए। उक्त प्रतिवेदनमाथि सोमबारदेखि छलफल हुनेछ।
करिब दुई घण्टा स्थायी कमिटी बैठक चलेर स्थगित भएको छ।
बैठकमा महासचिव विष्णु पौडेलले विधान संशोधन प्रस्ताव पनि पेश गरेका छन्।
स्थायी कमिटी सदस्य भीम रावलले सोमबार ११ बजे फेरि बैठक बस्ने जानकारी दिए।
नेकपाले एक वर्षपछि स्थायी कमिटी बैठक डाकेको हो।
‘पार्टी बैठक ढिला गरी बोलाइएको थियो। यसमा त्रुटि छन्। आगामी दिनमा यसलाई दोहोरिन नदिने प्रतिवद्धता अध्यक्षले राख्नुभयो,’ बैठकपछि रावलले पत्रकारहरूसँग भने।
बैठकमा पार्टी अध्यक्षसमेत रहेका प्रधानमन्त्री केपी शर्मा ओली उपस्थित भएका थिएनन्।
एपेन्डिसाइटिसको शल्यक्रियापछि प्रधानमन्त्री ओली आराम गरिराखेका छन्। उनको स्वास्थ्यमा सुधार भइराखेको छ।
आइतबार नै बसेको सचिवालय बैठकले स्थायी कमिटी बैठकका लागि पाँच एजेन्डा तय गरेको थियो।
राजनीतिक प्रतिवेदन पेश, केन्द्रीय कमिटी बैठक बोलाउने, नेपाल-भारत सीमा विवाद, विधान संशोधन र अन्य एजेन्डा छलफलका लागि तय थिए।
नेकपाको स्थायी कमिटी ४५ सदस्यीय छ।