शहरी विकास मन्त्री गोकुल बाँस्कोटाले शहरी विकास मन्त्रालय अन्तर्गतका आयोजनाहरुमा ढिलासुस्ती नगर्न निर्देशन दिएका छन्।
भवन विभागमा आयोजित आयोजनाका प्रमुखहरुको कार्यक्रममा बोल्दै मन्त्री बाँस्कोटाले समयमै काम सम्पन्न गर्दा आइपर्ने बाधा अड्चनबारे जानकारी गराउन समेत निर्देशन दिए।
‘हामी एकैचोटी धेरै आयोजनाहरु ओगटेर बस्छौँ, तर काम भने पुरा गर्न सक्दैनौँ, बास्कोटाले भने, ‘धेरै आयोजनामा थोरै थोरै बजेट राखेर केही नगर्न भन्दा थोरै आयोजना भएपनि समयमै सम्पन्न गर्नमा ध्यान दिनोस्।’
ठेकेदारलाई सजिलो र असजिलो पार्नतिर नलागी आयोजनालाई सम्पन्न गर्नमा ध्यान दिन उनले आग्रह गरे। ‘विभिन्न प्रलोभनहरु आउँछन्, तिनका पछाडि लाग्ने हो भने कुनै काम हुँदैन’, उनले भने, ‘मलाई त कति प्रलोभन देखाएर पैसा दिनेहरु आउँछन्, तपाईहरुलाई नआउने कुरै भएन। यस्ता प्रलोभनको पछाडि नलागिकन काम गर्ने हो।’
कहाँबाट कस्तो प्रलोभन आयो भन्नेबारे भने मन्त्री बास्कोटाले केही खुलाएनन्। अनावश्यक रुपमा करारमा कर्मचारी राख्ने काम नगर्न समेत उनले निर्देशन दिए।
गोदावरीमा बन्न लागेको ३ हजार क्षमताको सभाहल निर्माणको काम समयमै सम्पन्न गर्न समेत उनले निर्देशन दिए। यसका लागि कुनै अवरोध आएमा त्यसलाई समाधान गर्ने बाँस्कोटाले बताए।
सिंहदरबारभित्र बन्न लागेको संसद भवन र भैंसेपाटीमा बन्न लागेको मन्त्री निवासको कामलाई तिब्रता दिन समेत उनले निर्देशन दिए।
