प्रधानमन्त्री एवं नेकपा अध्यक्ष केपी शर्मा ओली र अर्का अध्यक्ष पुष्पकमल दाहाल 'प्रचण्ड' बीच शुक्रबार पनि सभामुख चयनबारे कुराकानी भएको छ।
दुई अध्यक्षबीच दोस्रो दिन भएको छलफलले पनि कुनै निष्कर्ष निकाल्न सकेन। दुवै अध्यक्षले सभामुखका लागि आ-आफ्ना अडान छाडेका छैनन्।
शुक्रबार प्रधानमन्त्री निवास बालुवाटरमा प्रमुख विपक्षी नेपाली कांग्रेसका नेताहरूसँग सत्यनिरुपण र बेपत्ता आयोगबारे छलफल भएको थियो। त्यही छलफलपछि दुई अध्यक्षबीच भेट भएको हो।
प्रधानमन्त्री ओलीले प्रचण्डलाई 'तपाईंले पार्टीमा सभामुखबारे निर्णय गराउन सक्नुभएन, अब म संसदीय दलबाट निर्णय गराउँछु' भनेका स्रोतले बतायो।
ओलीले प्रचण्डलाई कुन सन्दर्भमा त्यसो भनेका हुन्, खुलेको छैन। ओली प्रचण्डसँग जिस्किएका हुन् वा अब सहमति नभए संसदीय दलमा चुनाव गराएर भए पनि सभामुख चुन्ने संकेत गरेका हुन्, प्रस्ट छैन।
पूर्व माओवादी पक्षधर नेताहरूका अनुसार दुई अध्यक्षबीच शुक्रबारको छलफल केही सकारात्मक भए पनि निष्कर्षमा पुगिसकेको छैन।
प्रधानमन्त्री ओलीनिकट नेताहरू उनी पूर्वसभामुख सुवास नेम्वाङलाई सभामुख बनाउने निर्णयबाट अझै पछि नहटेको बताउँछन्।
'प्रधानमन्त्रीको चाहना अहिले पनि नेम्वाङजीलाई नै सभामुख बनाउने भन्ने हो। उहाँलाई मैले उत्साही नै पाएको छु,' प्रधानमन्त्रीनिकट एक मन्त्रीले भने, 'प्रधानमन्त्रीले आफूलाई सहज बनाउन विश्वासिलो व्यक्तिलाई सभामुख बनाउन खोज्नुभएको हो।'
ती मन्त्रीका अनुसार पूर्वमाओवादीलाई सभामुख दिनुपरे आफूले रोजेको व्यक्ति हुनुपर्ने प्रधानमन्त्रीको अडान छ।
अमेरिकी परियोजना एमसिसीप्रति पूर्वमाओवादीहरू नकारात्मक रहेकाले पनि प्रधानमन्त्री सशंकित बनेका छन्। संसदबाट एमसिसी पारित गराउन सहज भूमिका खेल्न सक्ने व्यक्तिलाई प्रधानमन्त्रीले सभामुख बनाउन चाहेको ती मन्त्रीले बताए।
प्रधानमन्त्री ओली भैंसेपाटी भेलापछि अझै बढी सशंकित भएको उनीनिकट नेताहरूको बुझाइ छ।
एक साताअघि नेकपा सचिवालय सदस्य वामदेव गौतमको भैंसेपाटी निवासमा अध्यक्ष प्रचण्ड, वरिष्ठ नेता झलनाथ खनाल, माधव नेपाल र नारायणकाजी श्रेष्ठबीच भेला भएको थियो।
गत शनिबार प्रचण्डको अध्यक्षतामा बसेको सचिवालय बैठकले उपसभामुख शिवमाया तुम्बाहाङ्फेलाई राजीनामा गराउने निर्णय गरेको थियो। सचिवालय बैठकमा ओली भने उपस्थित थिएनन्। आफूलाई सचिवालय बैठकले राजीनामा माग्न नसक्ने भन्दै तुम्बाहाङ्फेले बरू संसद अघि बढाउने चेतावनी दिएकी थिइन्।
त्यसपछि दुई अध्यक्षले उनलाई बालुवाटार बोलाएर सूचना टाँसेर संसद बैठक सार्न आग्रह गरेपछि माघ ६ गतेसम्म बैठक स्थगित भएको छ।
पूर्वमाओवादी पक्षधर नेताहरू उपसभामुखले राजीनामा नदिनुमा प्रधानमन्त्री ओलीकै हात रहेको ठान्छन्। प्रधानमन्त्री पक्षधर नेताहरूले भने उपसभामुखलाई सचिवालयले राजीनामा गराउन नसक्ने बताउँदै आएका छन्।
आरोप-प्रत्यारोपबीच दुई अध्यक्षको चार दिनसम्म छलफल हुन सकेन। बिहीबार र शुक्रबार दुई दिन लगातार उनीहरूले भेट गरेका हुन्।
प्रचण्डले आफूनिकट स्थायी समिति सदस्य अग्नि सापकोटालाई सभामुख बनाउन चाहेका थिए। सापकोटाको नाममा प्रधानमन्त्री सकारात्मक नभएपछि विकल्पमा अन्य नेतालाई पनि अघि सारेको स्रोतले बतायो।
स्रोतका अनुसार प्रचण्डले अर्का स्थायी समिति सदस्य हरिबोल गजुरेललाई पनि अघि सारेका छन्। आफूले सभामुख दाबी नगरेको भन्दै गजुरेलले पार्टीले दिएको जिम्मेवारीअनुसारै बढ्ने बताए।
प्रचण्डका प्रेस संयोजक विष्णुप्रसाद सापकोटा 'जुगल' ले दुई अध्यक्षको भेट सकारात्मक ढंगले अघि बढेको बताए।
प्रधानमन्त्रीका प्रेस सल्लाहकार सूर्य थापाले दुई अध्यक्षबीच माघ ६ गतेसम्म सहमति गरेर अघि बढ्ने गरी छलफल भइरहेको जानकारी दिए।
'दुई अध्यक्षबीच सकारात्मक दिशामा छलफल बढेको छ,' उनले भने।
