लामो समय रस्साकस्सीपछि सत्तारूढ नेकपाले अग्नि सापकोटालाई सभामुखको उम्मेदवार बनाएको छ।
प्रधानमन्त्री एवं पार्टी अध्यक्ष केपी शर्मा ओली र अर्का अध्यक्ष पुष्पकमल दाहाल 'प्रचण्ड'बीच सभामुख चयनमा लामो समय रस्साकस्सी चलेको थियो। दुवै अध्यक्षले आ-आफ्ना उम्मेदवार अघि सारेपछि पार्टीले तय गर्न सकेको थिएन।
प्रधानमन्त्री ओलीले पूर्वसभामुख सुवास नेम्वाङलाई सभामुख बनाउन चाहेका थिए भने प्रचण्डले अग्निलाई अघि सारेका थिए। यही कारणले संसद बैठक चार पटकसम्म सूचना टाँसेर स्थगित भइसकेको छ।
अग्निलाई सभामुख बनाउने प्रचण्डको अडानमा पूर्व एमाले नेताहरूले नै साथ दिएपछि प्रधानमन्त्री ओली अन्तिम समयमा आफ्नो अडानबाट पछि हटेका छन्।
पूर्व प्रधानमन्त्री तथा सचिवालय सदस्यहरू माधव नेपाल र झलनाथ खनालका साथै सचिवालय सदस्य वामदेव गौतमले पनि प्रचण्डले अघि सारेका अग्निको पक्षमा आफूहरूलाई उभ्याएका थिए। आइतबारको सचिवालय बैठकमा पनि प्रचण्डकै पक्षमा तीनै नेताहरूले आफ्ना धारणा राखेका थिए।
स्रोतका अनुसार नेकपाभित्र ओली र प्रचण्डपछिका बलिया नेता नेपालले प्रचण्डलाई सबभन्दा बढी साथ दिएका थिए। पछिल्ला दिनमा नेता नेपालले निरन्तर रूपमा प्रचण्डलाई सभामुख पद नछाड्न सुझाव दिने गरेको उनी निकट श्रोतले सेतोपाटीलाई बतायो।
'माधव कमरेड कसैको पनि विपक्षमा उभिनुभएको होइन,' नेपालनिकट एक नेताले भने, 'उहाँको एउटै धारणा के थियो भने, सभामुख पूर्व माओवादी पक्षधरले पाउनुपर्छ। नत्र पार्टीमा शक्ति सन्तुलन बिग्रिन्छ।'
माधव नेपालले दीर्घकालसम्म पार्टीमा एमाले र माओवादी दुई धार कायम रहन ठीक नभए पनि तत्काललाई यो स्वाभाविक भएको बताउने गरेका छन्।
'माओवादी हामीमा विलय भएजसरी उसलाई व्यवहार गर्नुहुन्न,' नेपाललाई उद्धृत गर्दै ती नेताले भने।
सभामुख चयनको विषयले पार्टीमा प्रवेश पाएदेखि नै प्रचण्ड र नेपालबीच बाक्लो भेटघाट र छलफल भएको ती नेताले दाबी गरे। आइतबार पनि बालुवाटारमा ओलीसँग छलफल गरेर प्रचण्ड माधव नेपालको निजी निवास कोटेश्वर पुगेका थिए।
प्रचण्ड कहिलेकाहीँ 'भावनामा बहकिने' नेता भए पनि आफ्नो समूहको साथले यसपालि अडिग रहेको ती नेताले दाबी गरे।
वरिष्ठ नेता नेपाल व्यक्तिगत रूपमा पनि सभामुखका उम्मेदवार बनाइएका सापकोटासँग सकारात्मक थिए। नेपाललाई भेट्न सापकोटा कोटेश्वर पहिल्यैदेखि गइरहन्थे। आफूसँग निकट सम्बन्ध रहेकाले पनि सापकोटाप्रति नेपाल सकारात्मक रहेको श्रोतले बतायो।
आइतबारको सचिवालय बैठकमा दुई अध्यक्षले सापकोटालाई उम्मेदवार बनाउने सहमति गरेर आएकाले अन्य विषयमा धेरै छलफल नभएको बैठकमा सहभागी एक नेताले सेतोपाटीलाई बताए।
सापकोटाको द्वन्द्वकालीन मुद्दाको प्रसंग पनि प्रचण्ड आफैंले बैठकमा उठाउँदै 'त्यसमा धेरै पीर गर्नुपर्ने आवश्यकता नरहेको' बताएका थिए।
प्रचण्डले त्यस्ता मुद्दा आफूलाई पनि भएको र गृहमन्त्री रामबहादुर थापा 'बादल'लाई पनि रहेको बताएका थिए।
'मलाई र बादलजीलाई पनि मुद्दा छ। त्यस्ता कुराले असर गर्दैन,' प्रचण्डको भनाइ उद्धृत गर्दै श्रोतले भन्यो, 'मैले कानुन व्यवसायीहरूसँग पनि कुरा गरेको छु। त्यसैले केही हुँदैन।'
द्वन्द्वकालमा विद्यालय व्यवस्थापन समितिको विवादमा काभ्रेका अर्जुन लामाको तत्कालीन विद्रोही माओवादीले हत्या गरेका थिए। लामाको हत्यामा सापकोटासहितका नेताहरूको संलग्नता रहेको भन्दै परेको मुद्दा अदालतमा विचाराधीन छ।
शिवमायाले के गर्लिन्?
सभामुख चयनको प्रक्रिया उपसभामुख शिवमाया तुम्बाहाङ्फेले लिने कदममा पनि निर्भर रहने नेकपाका एक सचिवालय सदस्यले बताए।
'पार्टीले भनेकै भरमा उहाँले राजीनामा दिनुपर्छ भन्ने छैन। कानुनी अप्ठ्यारा पनि छन्। हिजो उहाँ नेकपा एमाले तर्फबाट उपसभामुख हुनुभएको हो। अहिले त एमाले छैन,' सचिवालयका ती सदस्यले भने।
उपसभामुखलाई पार्टीको निर्देशन नलाग्ने हुँदा राजीनामा दिने वा नदिने भन्ने उनको स्वतन्त्रताको कुरा रहेको ती सदस्यले बताए।
सापकोटा-प्रधानमन्त्री बालुवाटारमा भेट
आफूलाई सभामुख उम्मेदवार बनाउने निर्णय पार्टीले गरेपछि सापकोटा प्रधानमन्त्री ओलीलाई भेट्न आइतबार साँझ बालुवाटार पुगेका थिए।
उनीहरूबीच के कुरा भयो थाहा छैन। तर पार्टी अध्यक्ष, प्रधानमन्त्री तथा संसदीय दलका नेताले आफ्नो पार्टीको तर्फबाट सभामुखको उम्मेदवारलाई भेट्नु स्वाभाविक भएको बालुवाटार श्रोत बताउँछ।