चीनको कम्युनिष्ट पार्टी (सिपिसी) केन्द्रीय कमिटीको पोलिटिकल ब्यूरोको स्थायी समितिमा कोरोना भाइरसले निम्त्याएको निमोनियाको प्रकोप रोक्न र नियन्त्रण गर्ने सम्बन्धमा शनिबार छलफल भएको छ।
बैठकको अध्यक्षता सिपिसी केन्द्रीय समितिका महासचिव एवम् राष्ट्रपति सि–चिनफिङले गरेका थिए। बैठकले रोग नियन्त्रणका लागि भएका कामको निरीक्षण गर्न एक सिपिसी केन्द्रीय समितिको नेतृत्वमा समूह गठन गर्ने निर्णय गरेको छ।
समूहले बिरामीको उपचारसम्वन्धी थप अध्ययन तथा रोग नियन्त्रणका लागि नयाँ व्यवस्था गर्ने भएको छ। समूहलाई प्रत्यक्ष काम गर्न हुवेई प्रान्तमा पठाइनेछ। ‘जीवन सर्वोपरी महत्वपूर्ण छ। जब महामारी फैलिन्छ, कमान्ड जारी गरिन्छ। यसलाई रोक्नु तथा नियन्त्रण गर्नु हाम्रो जिम्मेवारी हो,’ सिलाई उदृत गर्दै सिन्ह्वाले भनेको छ।
उनले कोरोना भाइरसको नियन्त्रणलाई प्राथमिकताका रुपमा लिन सम्पूर्ण पार्टी समिति तथा सरकारी तहका व्यक्तिलाई आदेश दिए।
कामको महत्व र जरुरता राम्ररी बुझ्न सिले निर्देशन दिए। उनले पार्टी र सरकारी अधिकारी, विशेषगरी नेतृत्वकर्ता आफ्नो काममा जागरुक हुनुपर्ने बताए। ‘सामाजिक स्थायित्वको रक्षा गर्न अग्रसर हुनुपर्छ, नागरिकलाई शान्तिमय तथा रमाइलोसँग चिनियाँ नववर्ष उत्सव मनाउने वातावरण बनाउन सरकारी अधिकारीहरुले सुनिश्चितता गरिदिनुपर्छ’ उनले भने।
सम्वोधनका क्रममा सिले कोरोना भाइरसको प्रकोप नियन्त्रणका लागि निकै जोड दिएका थिए।
जनताको जीवन र स्वास्थ्यलाई शिर्ष प्राथमिकतामा राख्न सबै तहका पार्टी समिति र सरकारका व्यक्तिलाई उनले आग्रह गरे। बैठकले संक्रमित बिरामीहरूको उपचार गर्न, स्वास्थ्यकर्मीहरूको वृद्धि गर्न र नागरिक तथा सैनिक स्वास्थ्य स्रोतको समन्वय गर्न माग गरेको थियो।