नेकपा महासचिव विष्णु पौडेलले पार्टीभित्र पूर्वसमूहको मानसिकता र गुट-उपगुटहरू चुनौती बनेको बताएका छन्। बुधबार सुरू केन्द्रीय कमिटी बैठकमा संगठनात्मक प्रतिवेदन पेस गर्दै महासचिव पौडेलले 'पार्टीको आन्तरिक जीवनलाई विधिसम्मत, संस्थागत र कमिटी प्रणालीमा आधारित बनाउन नसकेको' बताए।
उनले आफ्नो प्रतिवेदनमा पार्टीभित्र घोषित रूपले गुटबन्दी बढ्दै गएको र अराजकता र अनुशासनहिनताको समस्या झांगिएको उल्लेख गरेका छन्। बैठकका समाचार गलत तरिकाले मिडियामा जानबाट रोक्न मिडियाको उपस्थिति स्वीकार्नुपर्ने प्रस्तावसमेत उनले राखे।
'बैठकमा भएको छलफल र निर्णयका सम्बन्धमा अनधिकृत तोडमोड गरिएका र गलत सूचना सम्प्रेषण गर्ने रोगबाट पार्टी आक्रान्त बनेको छ। केन्द्रीय सचिवालयसमेत यस्तो प्रवृत्तिबाट अलग रहन सकेको छैन,' महासचिवले प्रतिवेदनमा भनेका छन्, 'यस्तो प्रवृत्ति बारम्बार दोहोरिने हो भने हामी बैठकमा मिडियाको प्रत्यक्ष र नियमित उपस्थितिका लागि तयार हुनुपर्ने अवस्थामा पुग्छौं। गलत समाचार सम्प्रेषण हुनुभन्दा बैठकमै मिडियाको उपस्थिति र प्रत्यक्ष प्रसारण मञ्जुर हुन्छ। के हामी यसका लागि तयार हुने हो?'
बैठकका निर्णय आधिकारिक ठाउँबाट मात्र सार्वजनिक गर्ने प्रणालीमा कायम रहनुपर्ने भन्दै पौडेलले अनधिकृत र गलत सूचना सम्प्रेषण गर्ने प्रवृत्ति रोक्नुपर्नेमा जोड दिए।
कांग्रेससँग नजिक भएर गलत गर्यौं
दुई कम्युनिस्ट पार्टीले एकअर्कालाई टाढा र कांग्रेस लगायत दक्षिणपन्थी शक्तिहरूलाई नजिक ठानेर गल्ती गरेको निष्कर्षसमेत प्रतिवेदनमा छ। यही कारणले पहिलो संविधानसभा संविधान जारी नगरी विघटन भएको उनले उल्लेख गरे।
दोस्रो संविधानसभा निर्वाचनमा पनि आफ्नो शक्ति वा सामर्थ्यलाई वस्तुनिष्ठ ढंगले बुझ्न असमर्थ भएको पौडेलले बताए। दोस्रो संविधानसभासम्म आइपुग्दा दुई पार्टीबीच संविधानको अन्तरवस्तुमा गम्भीर मतभेद भए पनि प्रतिगमनले टाउको नउठाओस् भनेर सहमति र सम्झौतामा आएको पौडेलको प्रतिवेदनमा उल्लेख छ। त्यही आधारमा संविधान जारी भएको उनले बताएका छन्।
पार्टीको सम्पूर्ण अधिकार संगठित सदस्यमा निहित हुने भन्दै प्रतिवेदनमा भनिएको छ, 'निर्णय प्रक्रियामा जनवाद र निर्णय कार्यान्वयनमा केन्द्रीयता प्रभावी हुनेछ। निर्णय प्रक्रियामा मत राख्ने स्वतन्त्रता र निर्णय कार्यान्वयनमा एकरुपता हुनेछ। फरक मतका कारण भेदभाव गरिने छैन, बहुमतले अल्पमतको कदर गर्नुपर्नेछ।'