कपिलवस्तुको जयनगरस्थित बजार क्षेत्रमा सरकारी जग्गा र वन अतिक्रमण गरी बनाइएका १४ वटा घरटहरा हटाइएको छ।
जिल्लाको बुद्धभूमि नगरपालिकास्थित जयनगर बजारमा वन क्षेत्र तथा सडक अतिक्रमण गरी पसल सञ्चालन गरिएका १४ वटा घरटहरा डोजर लगाएर भत्काइएको हो।
विगत ३ महिनादेखि पटक/पटक घरटहरा हटाई सार्वजनिक जग्गा खाली गर्न सूचना जारी गरे पनि अटेर गरेपछि शुक्रबार डोजर लगाएर खाली गरिएको डिभिजन वन कार्यालय कपिलवस्तुले जनाएको छ।
शुक्रबार डिभिजन वन कार्यालयसँगै बुद्धभूमि नगरपालिका, त्रिशूली सामुदायिक वन र स्थानीयवासीको अगुवाइमा घरटहरा हटाएर जग्गा खाली गरिएको बताइएको छ। भत्काइएका घरटहरामा अधिकांश चियाखाजा पसल सञ्चालन गरिएका थिए।
डिभिजन वन कार्यालय तौलिहवाका प्रमुख ईश्वरी पौडेलले जयनगर बजारसँगै जोडिएको वनक्षेत्र दिनहुँ अतिक्रमणमा परेपछि बाध्य भएर घरटहरामा डोजर लगाउनु परेको बताएका छन्।
उनले जिल्लाका अन्य ठाउँमा पनि अतिक्रमणमा परेको वन क्षेत्र यही कार्यविधि अपनाइ खाली गरिने बताए। सशस्त्र प्रहरी, नेपाल प्रहरी र सशस्त्र वनरक्षकको उपस्थितिमा घरटहरामा डोजर लगाइएको थियो।
वन क्षेत्र अतिक्रमण गरी लामो समय बसेपछि डिभिजन वन कार्यालय, त्रिशूली सामुदायिक वन, बुद्धभूमि नगरपालिका र सम्बन्धित वडा कार्यालयले समेत पटक पटक घरटहरा हटाइ अन्यन्त्र स्थानान्तरण हुन आग्रह गर्दै आएको त्रिशूली सामुदायिक वनका अध्यक्ष निलकुमार श्रेष्ठले जानकारी दिए।