सरकारले मुख्य प्रशासनिक केन्द्र सिंहदरबार र देशभरका ६४ ठाउँबाट अहिले राष्ट्रिय परिचय पत्र वितरण गरिरहेको छ। तपाईंले राष्ट्रिय परिचय पत्र बनाउनु भएको छैन भने हतार नगर्नुस्।
प्रतिनिधि सभाको राज्य व्यवस्था समितिले राष्ट्रिय परिचय पत्र निर्माण गर्दा आँखाको नानी (आइरिस) को समेत सूचना संकलन गर्ने कानुनी व्यवस्थाको प्रस्ताव पारित गरेको छ।
समितिबाट पास भएर प्रतिनिधि सभा बैठकमा पेश हुने तयारीमा रहेको राष्ट्रिय पचियपत्र तथा पञ्जीकरण विधेयकले कानुनी हैसियत प्राप्त गरेपछि अहिले कार्ड बनाएकाहरुले समेत आफ्नो आँखाको नानीको विवरण सरकारलाई दिनुपर्ने हुन्छ। नयाँ कानुनी व्यवस्थापछि पुनः आँखाको विवरण दिने समय तपाईंले खर्चनुपर्छ।
अहिले कार्ड निर्माण भइरहँदा समेत सरकारले आँखाको नानीको विवरण संकलन गरेको छैन। राष्ट्रिय परिचय पत्र शाखाका निर्देशक चोमेन्द्र न्यौपानेका अनुसार आइरिसको विवरण संकलन गर्ने मेसिन खरिदका लागि भर्खर मात्रै टेण्डर भएको छ।
सरकारले कुनै स्पष्ट कानुनी आधार बिना नै राष्ट्रिय परिचय पत्र वितरण सुरु गरेको थियो। पाँचथर जिल्लाबाट ‘पाइलट प्रोजेक्ट’ सुरु गरेको सरकारले प्रधानमन्त्री र राष्ट्रपतिलाई सम्म कार्ड दिइसकेको छ। हालसम्म १ लाख १७ हजारले राष्ट्रिय परिचय पत्र लिइसकेका छन्। नयाँ कानुनपछि उनीहरुले सरकारी कार्यालय पुगेर आँखाको विवरण उपलब्ध गराउनुपर्छ।
प्रतिनिधि सभाको राज्य व्यवस्था समितिले विधेयकमा संशोधन गरेर दुवै हातका दश औँलाको विवरणसँगै आइरिस समेत संकलन गर्ने प्रावधान समेटेको छ।
आइरिस विवरण संकलन भएपनि कार्डमा आइरिसको विवरण भने हुने छैन। न्यौपानेका अनुसार अहिले कार्ड लिएकाहरुले कार्ड परिवर्तन गर्नुपर्ने छैन। तर उनीहरुले कुनै न कुनै बेला आइरिस विवरण दिनुपर्ने हुन्छ।
प्रतिनिधिसभाबाट पारित हुने क्रममा रहेको राष्ट्रिय परिचयपत्रसम्बन्धि विधेयक राष्ट्रिय सभाबाट पास भएर राष्ट्रपतिबाट प्रमाणिकरण भएपछि कानुन बन्नेछ।
