मकवानपुरको राक्सिराङ गाउँपालिकामा टाढाबाट धाएर विद्यालय आउने विद्यार्थीलाई लक्षित गरी छात्राबास निर्माण गरिने भएको छ।
सीमान्तकृत जातिका रुपमा रहेको चेपाङ जातिको बाहुल्य गाउँपालिकामा टाढाबाट पढ्न आउने विद्यार्थीका लागि छात्राबास निर्माण गरिने भएको हो।
राक्सिराङ ६, सिलिङेस्थित राष्ट्रिय माध्यमिक विद्यालयको छात्राबास निर्माणका लागि तीन कठ्ठा जग्गासमेत खरीद गरिसकिएको गाउँपालिकाका अध्यक्ष राजकुमार मल्लले जानकारी दिए।
खासगरी वडाध्यक्ष, विद्यालय व्यवस्थापन समिति तथा स्थानीय जनसमुदायको अगुवाइमा काम भइरहेको उनले बताए। छात्राबास निर्माणमा गाउँपालिकाले पूर्ण सहयोग गर्ने मल्लको भनाइ छ।
छात्राबास निर्माणका लागि आवश्यक जग्गा खरीद गर्न वडा नम्बर ६ का वडाध्यक्ष सिंहलाल चेपाङले आफ्नो छ महिना बराबरको वेतनसमेत हस्तान्तरण गरेका छन्।
विद्यालयको छात्राबास भवन निर्माणका लागि जग्गा खरीद गर्न विद्यालय व्यवस्थापन समितिका अध्यक्ष मोतिराम चेपाङलाई रकम हस्तान्तरण गरेको स्थानीय युवा समाजसेवी प्रसान्त चेपाङले जानकारी दिए। रासस