स्रोत नखुलेको चालीस लाख ५७ हजार एक सय रुपैयाँसहित रुपन्देही प्रहरीले दुई भारतीय नागरिकलाई पक्राउ गरेको छ। पक्राउ पर्नेमा भारत थाना नौतनवा, ग्राम लौटनका रितेशकुमार मधेसिया र निजरकुमार अग्रहरी छन्।
उनीहरूलाई रुपन्देहीको सिद्धार्थनगर नगरपालिका वडा नम्बर १ बाइपासस्थित सडकबाट बिहीबार अपराह्न चार बजे पक्राउ गरिएको रुपन्देहीका प्रहरी प्रवक्ता प्रहरी नायब उपरीक्षक वीरेन्द्रबहादुर शाहीले बताए।
उनका अनुसार भारतीयद्वय युपी५६वाई ७०४९ नम्बरको मोटरसाइकलमा भारतबाट नेपाल आएका थिए। उनीहरुको जाँच गर्दा स्रोत नखुलेको ३८ लाख ९३ हजार १०० नेपाली र १ लाख ६४ हजार रुपैयाँ भारु फेला परेको शाहीले बताए।
शाहीका अनुसार उक्त रकम हुण्डीमा प्रयोग भएको आशंका छ। उनीहरूको साथबाट विभिन्न मितिमा काटिएका २७ लाख ४८ हजार ७०० रुपैयाँ बराबरका दस थान चेक, विभिन्न बैंकका पाँच वटा चेक बुक र भारतीय तथा नेपाली बैंकका एटिएम कार्डहरू बरामद गरिएको छ।
पक्राउ परेकामाथि अनुसन्धान थालिएको प्रवक्ता शाहीले बताए।