तनहुँ जिल्लाका नौ ठाउँमा आकस्मिक पहिरो नियन्त्रणका लागि तटबन्धन निर्माण गरिएको छ।
पहिरोको जोखिममा रहेको जिल्लाका विभिन्न ठाउँमा भू तथा जलाधार व्यवस्थापन कार्यालयको सहयोगमा आकस्मिक पहिरो नियन्त्रणका लागि तटबन्धन निर्माण गरिएको हो।
पहिरो नियन्त्रणबाट करीब ५० हेक्टर जमिन संरक्षण भएको कार्यालयका प्रमुख दिवाकर पौडेलले जानकारी दिए। पहिरोको जोखिममा रहेका ती ठाउँमा संरक्षण गर्न स्थानीय उपभोक्ताको सहभागितामा पहिरो नियन्त्रण कार्यक्रम सञ्चालन गरिएको र यसमा २९ लाख ७५ हजार छ सय १९ रुपैयाँ खर्च भएको उनले बताए।
सो कार्यका लागि कार्यालयका तर्फबाट १४ लाख ५१ हजार चार सय २३ रुपैयाँ उपलब्ध गराइएकामा स्थानीय उपभोक्ताले १५ लाख २४ हजार एक सय ९६ रुपैयाँ व्यहोरेका थिए। व्यास नगरपालिकाको वडा नं १, ६ र ८, भानु नगरपालिकाको वडा नं ६ र १३, ऋषिङ गाउँपालिका–६, आँबुखैरेनी गाउँपालिका–२, शुक्लागण्डकी नगरपालिका–२ र शुक्लागण्डकी नगरपालिका–४ मा आकस्मिक पहिरो नियन्त्रण कार्यक्रम सञ्चालन गरिएको कार्यालयले जनाएको थियो।
आकस्मिक पहिरो नियन्त्रणका लागि व्यास नगरपालिकाका तीन वडामा कार्यालयको चार लाख ३२ हजार दुई सय ६९ रुपैयाँ र उपभोक्ताको चार लाख ४५ हजार पाँच सय ८७ रुपैयाँ, भानु नगरपालिकाको दुई वडामा कार्यालयको दुई लाख ६३ हजार चार सय ७३ रुपैयाँ र उपभोक्ताको तीन लाख ६७ हजार पाँच सय रुपैयाँ खर्च भएको थियो।
ऋषिङ गाउँपालिकाको एक वडामा कार्यालयको दुई लाख चार हजार दुई सय आठ रुपैयाँ र उपभोक्ताको एक लाख ९६ हजार सात सय ९० रुपैयाँ, आँबुखैरेनीको एक वडामा वडा कार्यालयको ४२ हजार दुई सय ८६ रुपैयाँ र उपभोक्ताको ६५ हजार आठ सय रुपैयाँ, शुक्लागण्डकीको दुई वडामा कार्यालयको पाँच लाख नौ हजार एक सय ८३ रुपैयाँ र उपभोक्ताको चार लाख ४८ हजार पाँच सय १८ रुपैयाँ खर्च भएको थियो।
कार्यालयमार्फत सञ्चालित नदी उकास तथा जग्गा संरक्षण कार्यक्रमबाट व्यास नगरपालिकाका तीन र म्याग्दे गाउँपालिकाको एक गरी चार वडाका चार सय ५९ घरधुरी लाभान्वित भएका छन्। व्यास नगरपालिका–११ का ४२, व्यास नगरपालिका–१ का ९२, व्यास नगरपालिका–३ का एक सय ६० र म्याग्दे गाउँपालिका–१ का एक सय ६५ घरधुरी लाभान्वित भएको कार्यालय प्रमुख पौडेलले जानकारी दिए। पौडेलका अनुसार उक्त कार्यक्रमका लागि कार्यालयको तर्फबाट नौ लाख ९९ हजार सात सय ७४ रुपैयाँ र उपभोक्ताको तर्फबाट छ लाख ४२ हजार एक सय ५० गरी कूल रु १६ लाख ४१ हजार नौ सय २४ रुपैयाँ खर्च भएको थियो।
कार्यालयबाट सञ्चालित योजनामा दुई पोखरी निर्माण भएकामा यसबाट सिँचाइ गर्न गाईवस्तुलाई खुवाउन र पर्यटन प्रवर्द्धनमा सघाउ पुगेको कार्यालय प्रमुख पौडेलले जानकारी दिए। साथै दुई हजार एक सय ६२ घरधुरीको खानेपानीको जलाधार क्षेत्र तथा पानीको मूलस्रोत संरक्षणमा टेवा पुगेको उनले बताए। रासस
